Kombîyayîşo girs seba şoreşê Kurdîstanê Rojawanî qezaya Qoserî de bi hezaran kesî amey têlewe. Sîyasetkaro kurd Ahmet Turkî mîtîngo girs ê Qoserî de qiseykerdişê xo de va ke xoserîya şarê kurdî nêzdî ya û kes besenêkeno bi kayêde qilêrin virênîya naye bicêro.
Bi parolayê “Xoserîya şima selam kenîme” Qoser de şodir ra bi hezaran kesan duştê qedexekerdiş hetê wezîrîya karanê zereyî ya Tirkîya de meydanê mîtîngî kerd pirr. Serekê DTK Ahmet Turk uca de qisey kerd fikrê xo nîya ardî ziwan: “Şaro kurd her ca de seba xoserîya xo uşt ra payan ser. Vengê şima tîya ra reseno Qamişlo, Kobanî. Zerrîya ma bi înan a, ez tîya ra înan selam kena, wa serkewte bê!”
Ahmet Turk qiseykerdişê xo de eşkera kerd ke êdî seba şarê kurdî demêde newe ame. “Qet mîtîngê partîyanê bînan qedexe nêkenê, labelê ma ra tersenê, raywanîya xoserîya ma ra tersenê, wazenê ke vengê ma bibirnê. Ma no kayo qilêrin kenîme xirabin. Rojê ameyoxî rojê şarê kurdî yê. Eke ma nika rind şêrîme, na seserre bena yê şarê kurdî. Şarê ma ke serkewtişê xo rê wayîr bivejîyo, xoserîya ma kî nêzdî ya.”
Qiseykerdişê Ahmet Turkî ra tepîya hunermend Serhadoyî kilamî vatî.
