Tirkîya de sîyasetê rakerdişê demokratîkî ra dime hîna sîyasetkarê kurdî tewqîf benê. Operasyonê KCK de vizêr ancîya (onca) Êlih de da-40 kesî amey tewqîf kerdene, nika binê nezaretî der ê. Aye ra kî dot Mûş, Bidlîs û Îzmîr de polîsî banî (bonî) cêray.
Binê nameyê “KCK” de Êlih û qezayanê Êlihî de şodir hetê polîsî ra operasyonî amey viraştene. Tede polîs kot banê (bonê) BDP, buroyê rojnameyê Azadiya Welat, Egîtîm Sen, Meyader, Komela Êlihî ya Alimanê Dînî, Merkezê Kulturî û xeylê bananê (bonanê) bînan. Bi sebebê “endambîyayîşê parlamentoyê KCK” de xeylê huşkedîsk, CD, kaset û belgeyê resmî amey arê dayene. Bê ke avûkatê tewqîfbîyayeyan ci ra xeberdar bê, operasyonan dewam kerd. Melumatan ra gore 41 kesî amey tewqîf kerden, zafêrîya înan sîyasetkarê BDP ê.
Tayê şaristan û şaristanekan de operasyonî hetê BDP û şarî ra amey protesto kerdene.
Di hewteyan ra ver ancîya (onca) 31 kesî operasyonê KCK de ameybî pêgirewtene, wekîla Wanî Fatma Kurtulan û serekê kanî ê DEHAP Tuncer Bakirhanî kî tede bîyê. Binê rejîmê AKP de Tirkîya de hewteyanê peyênan de bi seyan sîyasetkar û roşnvîrê kurdî amey pêgirewtene. Bi nê 41 kesan ra binê nameyê operasyonê KCK de 10. kanûne 2011 ra bi nat 53 rojan de tewr tay 608 kesî amey girewtene binê nezaret, nînan ra 350 amey tewqîf kerdene. Mîyanê tewqîfkerdeyan de serekê beledîya, sîyasetkar, rojnameger, wendekar, doman, aktîvîstê heqanê merdiman û sendîkavanî estê.
Pêro pîya nê di serranê peyênan de nêzdîyê 4.000 kurdî operasyonanê sîyasîyan de amey pêgirewtene.
