Serekê kanî yê Kongreyê Kurdîstanî yê Neteweyî Îsmet Şerîf Vanlî dinyaya xo vurna. Îsmet Şerîf Vanli 87 serrî de bî û xeylê serrî weşîya xo Swîs Lozan de ramitêne.
Vanli semedê hemorojî ra aşma êlule de ameybî berdene bi nêweşxane. O taw ra hata merdişê xo nêweşxane de bîyo. Roja 09.11.2011 saeta 04:00 de nêweşxaneyêde Lozanî de Îsmet Şerîf Vanlî çimê xo pêro cinit û sereyê (sareyê) xo na ro.
Vanli paytextê Sûrîye Şam de 21. kanûne 1924 de ame dinya. Cêncîya xo de Celadet Alî Bedirxan, Qedrî, Ekrem Cemîlpaşa û Nurredîn Zazayî ra pîya seba mesela kurdan mucadele kerd. Dima, Lubnan, Fransa û Amerîka de perwerde dî û zonê (ziwanê) xo yê dayîke surgun de musa. Na mesele ser o Vanlî nîya vatîbî: “Her kes xeribîye de zonê (ziwanê) xo yê dayîke keno xo vîr ra. Mi kurdkî teber ra musaye.”
Îsmet Şerîf Vanlî 1948 de Lozan de Fakulteyê Huqûqî qedêna û 1995 de Parlementoyê Surgunî yê Kurdîstanî de beşdar bî. 1999 ra tepîya serekîya Kongreyê Kurdîstan yê Neteweyî kerde û kitabî nuştî.
