Serekê Mintiqaya Xoser a Kurdîstanî Mesûd Barzanî zîyaretê xo yê Tehranî ra dime ewro şî Anqara. Serekwezîrê Tirkîya Recep Tayyîp Erdoganî zîyaretê Barzanî seba 5. teşrîne qebul kerd. Babeta pêserameyîşî mucadeleyê PKK, operasyonê artêşa Tirkîya boverê sînoranê dewlete û têkilîya ekonomî ya Tirkîya û Kurdîstanê Başûrî ya.
Mesûd Barzanî ewro saeta 17:00 de Îstanbul de ame war û bi wezîrê karanê teberî yê Tirkîya Ahmet Davutogluyî de ame pêser. 29. teşrîne de Barzanî şîbî paytextê Îranî Tehran û hîrê rojî uca mend, serekkomar Mahmud Ahmedînecad û serekê dînî Ayetullah Alî Xamaneyî de ameybî têlewe.
Pêserameyîşê Barzanî bi temsîlkaranê Komara Tirkîya binê tesîrê pêtbîyayîşê lejê PKK û artêşa Tirkîya de ca girewt. Hetê ra sîyasetkarê Tirkîya Ewropa û Tirkîya de mucadeleyê xo duştê kurdan de zêdnenê, heto bîn ra kî artêşa tirke aşma tebaxe ra heta ewro koyanê Kurdîstanê Başûrî bomba kena. No bombarduman de heta nika 7 kesî, tede 4 domanî, merdî.
Demê şima bi xêr Embazê Delalî,
Xebere de amo nuştene ke “Mesûd Barzanî ewro saeta 17:00 de Îstanbul de ame war û bi wezîrê karanê teberî yê Tirkîya Ahmet Davutogluyî de ame pêser.” Kirmanckî de to ke nîya vaje şaş êno famkerdene. Şar êno pêser lê di merdimî nênê pêser (tirkîya ci: üstüste gelmek manasinda toplanmak). Di merdimî tena yewbînan (jubîna) vînenê. Coka nîya bîyamênê nuştene hîna bîyêne rind. “Mesûd Barzanî ewro saeta 17:00 de Îstanbul de teyara ra ame war û bi wezîrê karanê teberî yê Tirkîya Ahmet Davutogluyî yewbînan dî.
Serkewtişê şima wazena…