Tirkîya de bitaybetî serranê 1980 û 1990an de xeylê qetlîam û cînayetî ameybî kerdene. Propagandaya dewlete ra gore nê pêro qetlîamî ke tede xeylê sîvîlî bi tewirêde wehşî ameybî kiştene, hetê hêzanê PKK ra ameybî kerdene. Nê qetlîaman ra juyê (yew) kî Pinarcik û Başbaglar de bîyo. Nê rojan de endamo kan ê tîmê taybetî yê artêşa tirke Ayhan Çarkinî eşkera kerd ke no qetlîamê Pinarcik û xeylê cînayetê bînî hetê eskerîya dewleta Tirkîya ra amey viraştene.
Ayhan Çarkin 24 serran ra tepîya keno eşkera ke o bi xo no qetlîamê Pinarcikî de bitaybetî wezîfe girewte û uca (uza) de xeylê kesê sîvîlî kiştî. Serra 1987 de Pinarcik de 33 sîvîlî, dewijê kurdî ameybî kiştene. No serebût ra tepîya medyaya Tirkîya PKK û serekê xo jê (sey) “qetilê pitikan” îtham kerdîbî, çike no qirkerdiş de 16 domanî kî kişîyay. Resimê nê domanî rojnameyanê Tirkîya de ameybî neşr kerdene. Bi îfşakerdişê Çarkinî no propaganda jê (sey) manîpulasyono psîkolojîk a dewlete vejîya werte.
Tayê vateyê eşkerakerdişî yê Çarkinî:
“Îstîhbaratkarê ke werteyê 1989 heta 1993 Îstanbul de gureyayê, sermîyanê cayê Marmara ra serekê Dev-Solî, kesê MÎT gerek bêrê ardene dadgeh ver. Ez êndî qet çî ra nêtersena. Se beno wa bibo, ez êndî besenêkena ke lal vinderîne. Ma qerşunî eştî meyîtan, her meyîtî rê 70 qerşunî ginayê ci. Însanî çitur meyît ser o mize keno? Paskule dano? Nika xeylê banê (bonê) polîsan de koleksîyonê goşan esto. (…)
Her çi eskerîye kerd. Hîzbullah vanê, Hîzbullah çik o? Pêro nînan kerd. Wextê ma de Hîzbullah çin bî. Çike ê 1990 ra tepîya bîy. (…) Ma re kî adrese musnayêne, ma kî şîyêne uca (uza) de operasyon viraştêne. Seba kamî, çayê, ma kî nêzanayêne. Xo vîr ra nêkena. Reyê Tikko ra Kemal Yazar bî, ma ey destê xo ra dirbetin kerd. Mi o kişt. Dursun Karataş hetê dewlete ra hepis ra ame raverdayene, her çî naye ra tepîya bîyo. Dewleta nîyanêne mebo. Hem teror hem kî qehremanî dewlete ardê meydan.”
