Partîya BDP hêrişê polîsê tirkî ra tepîya qerarê bêîtaetîya sîvîle girewt. Bi no game ra BDP çar şertê çareserkerdişê meseleya kurdan nay ro.
- Perwerde bi zonê (ziwanê) dayîke
- Caverdayîşê sîyasetkaranê kurdan hepisan ra
- Qedîyayîşê operasyonanê sîyasî û eskerî
- Wedaritişê barajê weçinitşî yê 10%
Semedê waştişê nê şertan ra BDP û KKD Dîyarbekir de aksîyonê ronuştiş viraşt. Seba naye kî pêro şarê Amedî ame silayîye kerdene. Qerarê bêîtaetîya sîvîle ra nê çîyî amey dayene zanayene: “Des serrî yo ke şarê kurdî ame xapnayene û nê des serran de qet gamê verê helkerdişê probleman nêameye eştene. Êndî ma nêverdanîme ke no nîya dewam şêro. Ma bi gama bêîtaetîya sîvîle ra mudaheleyê nê prosesî kenîme û wazenîme ke şaro kurd êndî heqanê xo bicêro.”
Dîyabekir ra qederî Nisêbîn de kî ju (yew) pêserameyîş ame ronayene, uca (uza) de nêzdîyê 30.000 kesî amey pêser.
Roja 24.03.2011 de qerarê sîyasetkaranê kurdan ê Dîyarbekirî ra tepîya bêîtaetîya sîvîla verêne dest kerd ci. Nêzdîyê 50.000 kesî şaristan de amey têlewe. Polîsî nêverda ke kes şêro meydanê ke tede xeyme ameybî viraştene. No semed ra şar park de ronişt.
Ahmet Turkî uca (uza) de qisey kerd û hêrişê polîsî rexne kerd, va: “Şima se kenê wa bikerê. ma ancîya (onca) tîya (îta) r’ îme.”
Helikopterê ordîya tirke xeyle reyî serê mîtîngdaran de nêzdî ra çerexîya. Semedê nê protestoyî ra şaristananê bînan ê Tirkîya ra xeylê memurê polîsî amey Dîyarbekir.
