Rojnameyê Tirkîya Starî sosyologo namdar Îsmaîl Beşîkçî de ju (yew) roportaj viraşt. No roportaj de Îsmaîl Beşîkçî kî fikrê xo kurdan ser o ard zon (ziwan).
Mesela, roportaj de Beşîkçî armenîyan ser o qisey kerd va: “Seba ke 1915 de xeylê armenîyî hetê kiştoxanê kurdan ra amey kiştene, tayê welatanê rojawanê Ewropa hîna duştê şar û heqanê kurdan der ê.”
Boyna, Beşîkçî va ke ronayîşê dewleta federal a Kurdîstanî û pîlbîyayîşê aye zaf muhîmo. Seba Kurdîstanê Vakurî merdim (mordem) şikîno vajo ke 40-50 serran ra gore qezencê muhîmî vejîyayê meydan. Labelê bedelêde zaf giran ra gore no hîna zaf qijkek o. “Milet û dewleta milî hîna wenêdarîyayê. Nê tena vanê ke şarê kurdan wayîrê çîyê mebo. No slogan ra gore mezgê kurdan bêro têwerte kerdene. Mîsal, êyê ke nîya vanê, wazenê ke ju (yew) dewleta Filîstînî ya kî Sûdanê Vakurî bêro ronayene. Heto bîn ra kî Tirkîya ceribnena ke Qibrisê Vakurê bibo xoser. Naye her ca de, MY, Konseyê Ewropa, Yewîya Ewropa û Konferansê Ereban de anê ra zon (ziwan). Olîmpîyatê 2004 Atîna de 206 dewletî beşdar bîbîy, 2006 de na hûmara înan Pekîng de 206 bîye. Ewro 207 dewletî tede estê. Bi Sûdanê Başûrî benê 208. Têkilîya mîyanneteweyî de “birayîye” zaf yeno qisey kerdene. Eke di hetî têduşt nîyê, heqê xo ju (yew) nîyê, birayîye uca (uza) de çin a. Mîsal, eke Filîstîn de birayîye bivejîyo meydan, ereb û yahudîyî gerek erebanê Filîstîn rê ju (yew) dewlete rono ke merdim (mordem) birayîye ra qisey bikero.”
Sosyolog Dr. Îsmaîl Beşîkçî şarê kurdan nêzdî ra nas keno. Tawo ke her kes tersê kurdan Tirkîta de vila bîbî, Beşîkçî o wext derheqê kurdan de kitabî nuştî û heyatê xo ra 17 serrî hepisê Tirkîya de vêrd ra, pêro 32 kitabê xo ameybî qedexe kerdene. Îsmaîl Beşîkçî Çorum ra yo û naznameyê xo werteyê kurdan de “Mamostayo Çeqer” o.
