Cografyaya Kurdîstanî de her ca de kommezeleyê neweyî yenê dîyene. Nêzdîyê şaristanê Sêrt de kî enformasyonanê dewijan ra gore xeylê kommezelî estê. No semed ra hunermendanê kurdan raya Newala Qesaba girewte.
Hunermendî jê (sey) Ferhat Tunç, Mikaîl Aslan, Kerem Sevînç, Suavî, Şanar Yurdatapan û Îlkay Akkaya û xeylê hunermendê bînî kotî raya Newala Qeseba . Na raywanîye seba vengdayîşê MKM (Merkezê Kulturî yê Dicle û Firatî) ame viraştene. Dîyabekir de Kampusê Sumerbankî de hunermendî amey pêser û uca (uza) ra bi tomofîlan şîy Sêrt. Sêrt ra pê lingan raya Newala Qesaba ra şîyê. Uca de xeylê hezar kesî verba înan amey û sloganê “Şehidî nêmirenê” eştî. Hunermendan noca (naza) ra peyê pankartanê kurdkî û tirkî jê (sey) “Ma hunerê dezî ney, wa hunerê şayî û aştîye wazenîme bivirazîme. Kommezelî bêrê rakerdene û faîlî bêrê ceza kerdene” raya xo ra dewam kerd.
Dima, hunermendî cayê Newala Qesaba de fetilîyay û têfek ra kilama Dêrsimî “Dayê Dayê” vate. No esna de hunermendo kurd Ferhat Tunçî qisey kerd û ard zon (ziwan) ke Dêrsim, Zilan û Newala Qesaba de her ca de kommezelî este. Va: “Cografyaya kurde de êndî her kes goşê xo dano trajedîyêda girse ser. Medyaya tirke û hukmat nêwazenê ke na trajedîya însanan fehm bikerê. Ê wazenê ke na trajedî vîndî bikerê, manipule bikerê û nîya naye bidê xo vîr ra kerdene. Ma leyê şarê xo der îme û dezê ey pare kenîme. Rîyo qilêrin ê herbê 30 serran tîta (îta) de vindeno. Êndî na cografya cografyaya herb û merdişî mebo.”
Newala Qesaba de meyîtê komutanê namdarî yê PKK Mahsum Korkmaz, meyîtê xeylê gerîlla û sîvîlam estê. Dewijan no ca ra nameyê “Hêgayê Merdan” ya kî “Hêgayê Qesaban” nay pira. Hunermendî bi nûmayîşê xo wazenê ke pêro kommezelî bêrê eşkera kerdene û dewlete sucê xo qebul bikero.
Na raywanîye de nê hunermendî beşdar bîy: Ferhat Tunç, Suavî, Yusuf Çetîn, Feryal Onel, Mikaîl Aslan, Şanar Yurdatapan, Îlkay Akkaya, Kerem Sevînç, Jan Agin, Ozcan Alper, Zîya Taner Koçak, Koçer, Mrady, Erdal Avci, Alî Altaş, Hozan Beşîr, Şerko, Ozkan Kuçuk, Kazim Oz, Erol Balci, Kemal Ulusoy, Kemal Argun, Emîn Yalçinkaya, Vural Tantekîn û hunermendê MKM.
