Jorg Haîder sîyasetkaro konservatîfo rastgir ê Awusturya bî ke serra 2008 de sey (jê) netîceyê qezayê trafîkî merd. Enformasyonê rojnameyanê Ewropa ra gore, dîktatorê Lîbya Kaddafî û dîktatorê kanî Saddam Husseînî ra xeylê pereyî girewto. Heta merdena ey her kes îman kerdêne ke o merdimêde (mordemêde) pak û bêrişwet o.
Enformasyonan ra gore hesabanê bankayan ê nimitkî ê Lîxtinştaynî de xeylê mîlyon Euroyî yê Haîdarî estê. Tena (teyna) Kaddafî û Saddamî ra ey 60 mîlyon Euroyî girewtîbî. Hevalê kanî yê Haîderî ard ziwan (zon) ke Kaddafî serra 2000 de reyê 45 mîlyon Euroyî rusnayê hesabê nimiktî yê Haîderî.
Yew nasê Haîderî ke ey de her hewte şîyêne voştene, bi (ebe) nameyê Mîkschayî bi lajê Kaddafî, Saîf el-Îslam, Vîyana de unîversîteya taybetî Imadec de pîya wendo. Bi hevalêde bîn Haîderî serranê 1999, 2001 û 2004 de Lîbya zîyaret kerdo. Werteyê Haîder û Kaddafî henî rind bî ke yew qeseyê xo de Kaddafî va ke “Haîder nameyêde erebkî yo” (Haydar erebkî de yeno manaya şêrî). “Merdim (mordem) gerek ke ey bîyaro milîyetê Libya.”
Hetê ra nika beno eşkera ke serra 2007 de Haîderî xeylê mîlyonî Lîbya ra girewto û şaristanê Vaduzî de kerdo hesabê bankayê Hypo-Alpe-Adria ke nê pereyan rind bikerê sermayeyan. Ekspertê fînansî vanê ke Haîder û merdimê xo des serran de xeylê mîlyon pereyî na raye ra şutê. Naye de kî xeylê pereyî xo rê girewtê. Heto bîn ra yeno vatene ke Haîderî dîktatorê kanî yê Îraq Saddam Husseînî ra kî dorê 5-15 mîlyon Dollarî girewto. Eke rast o, tam nêno zanayene. Hama bellî yo ke karê Haîderî bi dîktator û zorbazanê na dinya pêt bî.
