Werteyê na aşme de karsazê amerîkanî Thomas Kaplan û fîlozofê fransizî Bernard-Henrî Levy rojnameyê Wallstreet Journalî de meqaleyê nuşte. Her di nuştoxan tede ard ziwan ke DYA Ukranya ra dima kî ganî ardimê kurdan bikerê.
Nuşteyê bi nameyê “Krîzê Ukranya de firsend” de Kaplan û Levy rexneyê DYA kenê. Ê vanê ke Amerîka mutefiqanê xo rê wefadar nîya. Na raştîye game bi game dinya de bena vila. Wextê xo de Obamayî besenêkerd Sûrîya de “xêzê sûrî” bipawo, Trumpî kî raşteraşt kurdî xapênayî sozê xo ser o nêvindet. Na bêbextî û bêwefayîye ke Efxanîstan de reyna bîye eşkera, bena sebeb ke Çîn, Rûsya û hetta dereceyêk kî Îran gêrayîşê muteqifan de benê reqibê DYA.
“Ukranyayijî û kurdî zanenê ke heyat heq nîyo”, nuştoxî dewam ra vanê. Şerê duştê DAÎŞ de kurdan 11.000 hezar şehîdî dayî, 23.000 bîyî birîndarî. Xelata înan rotişê heq û erdê kurdan bî. Nika pers beno tirêm binê serekkomarîya Joe Bîdenî de DYA firsendê Ukranya gênê ke îmajê xo pak bikerê? Pêşnîyaza nuştoxan a ke DYA tena çekan vila nêkerê, la pêroyê polîtîkaya xo ya teberî bivurnê cikerê yew doktrîno newe ke dest bido înanê ke amade yê seba erj û prensîbanê hemparan pêro bidê.
“Kurdan de dest pêbikerê”, meqale de nusîno. “Sey ukranyayijan, muteqifanê DYA yê kurdan duştê dişmenêde xedarî de lej kerd û serkewte vejîyayî. Vayaya nê serkewtişî gonî bîya ke Amerîka mecbur nêbîya ke bido. Sey ukranyayijan -welatê 40 mîlyonan ke mezgê Rûsya de neteweyêda raştikêne nîya- kurdî kî înkarkerdişê nasnameyê xo de yenê têrî. Hûmara înan 30 mîlyon a û ê dinya de neteweya bêdewleta tewr girs ê. Sey ukranyayijan ê kî rîyê cografyaya zore ra ke sînoranê Îran, Îraq, Sûrîya û Tirkîya mîyan der a, zehmetîye vînenê.” Dewam de Kaplan û Levy vanê ke Başûr û Rojawan de pêşmerge û şervananê kurdan rind musna ke ê hevalê amerîkanan ê ke bi hewayêdo tesîrdar hetê DYA de danê pêro.
Kurdan na bazirganîya mutefiqbîyayîşî qebul kerdbî û şehîdê xo dayî. La peynîya na peymane reyna îxanet bî. Nuştoxan ra gore xayînîya verêne referendumê 2007î de bîye, yê dîyine kî 2019 Sûrîye de bîye: gama ke leşkeranê Amerîka destûr da ci ke hêz û çeteyê tirkî yê îslamîstî bikewê Rojawanî ke mitefiqanê kurdan qir bikerê. Zafêrîya parlamentoyê DYA duştê nê qerarî de vejîyabî. Amerîka ra xeylê vengan îxanetê hukmatê Trumpî rexne kerdbî, serekkomar Bîdan û serekkomara hetkare Kamala Harrîs kî tede. Eke DYA wazenê bandura xo biseveknê, ganî xeletîyanê xo raşt bikerê. Coka, Kaplan û Levy çim de qerarê ardimê 40 mîlyar Dollaran seba Ukranya qerarêdo raşt o. La eynî dem de ganî amerîkanî piştgirîya kurdan bikerê. Her di nuştoxî pêbawer ê ke qeraro nîyanên hetê şar û parlamentoyê DYA ra destek gêno û verba rindêrkerdişê îmajê DYA gureyeno.
