Tirkîya û Kurdîstanê Vakurî de şar şî sindoqan ser û raya xo daye partîyanê parlamentoyê Tirkîya. Heta nika %99,3 yê sindoqan hûmarîyayî, netîceyo peyên ê weçînitişê emserî yê dîyinî neşr bî. Herçiqas netîceyo resmî 12 rojan de neşr beno, vurnayîşê girsî texmîn nêbenê.
Nîsbetê beşdarbîyayîşî berz bî: pêro pîya 48.522.149 weçînitoxî şîyî sindoqan ser, yanî %85,18 yê pêro weçînitoxan. Goreyê weçînitişê 7. hezîrane ra tayê çîyî vurîyayî. Na fay partîya muhafezekara dîndare AKP besekerd ancîya îqtîdar rono. Bi nêzdîyê %50 ê rayan partîya serekkomar Recep Tayîp Erdoganî reyna bena partîya tewr hêzdar a meclîsî. Partîya kemalîste CHP de vurîyayîşî kêmî, a bi %25,3 bîya dîyine. Vurîyayîşê tewr girsî partîyanê MHP û HDP de qewimîyayî. Partîya nasyonalîsta rastgire MHP kewt %11,9. Partîya Şaran a Demokratîke HDP kî kewt %10,8. Xora seba nê di partîyî tehluke estbî ke binê barajê %10 de bimanê.
Çi esto ke seba planê AKP ke qanûnê bingeyî pê referandum bivurno, tewr tay 330 wekîlî lazim ê. Yanî, AKP de 13 wekîlî kêmî yê. Tewr zaf rayî MHP kerdî vîndî: no weçînitiş de 40 wekîlî û 2 mîlyonî rayî kêmî vejîyaye meclîsî. HDP bitaybetî Îstanbul, Riha, Erdêxan û Qers de rayê xo yê weçînitişê hezîrane kerdî vîndî. 7. hezîrane de HDP 80 wekîlî rusnabîyî parlamento, nika 59 wekîlan rusnena. Nînan ra kî 24 cinîk ê. Parlamenterê HDP yê Îstanbulî Alî Kenanogluyî Twîtter ser o da zanayene ke HDP 11 wekîlî bi ferqêde qijkek kerd vîndî bi AKP.
Düzeltme; 11 Milletvekilini çok az oyla kaybettik. İşte o liste pic.twitter.com/JFVQh1Spcn
— Ali Kenanoğlu (@alikenanoglu) 2. November 2015
Pêro anketê ke amebîyî kerdene, nîya xelet vejîyayî. Anketan vatbî ke AKP mabênê %40 û %43 de cêna. Çapemenîya dîwelan ra gore planê Erdoganî yo ke bi ceng û sîyasetê nasyanolîstî hîna zêde rayan bicêro, ame ca. Çapemenî û rêxistinanê kurdan gerre kenê ke weçînitiş de xeylê îhlal û manîpulasyonî estbîyî. Merkezê HDP Google ser o yew xaritaya îhlalan kerde eşkera. 120 îhlalî resmî qeyd bîyî. Weçînitiş ra dime, hemserekê HDP Selahettîn Demîrtaşî qiseykerdişê xo de va ke “Ma 1 mîlyon rayî kerdî vîndî, la zaferê HDP girs o. Heya, ma rayî kerdî vîndî, labelê ma partî yîme ke duştê faşîzm û qetlîaman de payan ser o vindeta. Ma duştê her xeletîye de vindetîme. Dewro newe de kî ma yê duştê her teda û zulmî de vinderîme.”
