Qedexeyê tebervejîyayîşî yê Cizîre new rojan ra dime darîya we. Şar û şaristan halo yaman der ê.
21 meyîtî: Pit, Xort û Kokimî
Qezaya Şirnexî Cizîre de qedexeyê tebervejîyayîşî new rojan ra dime perey şodir darîya we. Vizêr ancîya amebî ronayene, la o ra dime reyna hewa nîya. Hûmara merdeyan ê new rojan tewr tay reşte 21. Tayî çimeyan de na hûmare hîna berz a.
Vizêr, 16 meyîtî ameyî wedardene. Bi des hezaran hemwelatîyan ê rast kerdî. Nameyê merdeyan bi serra înan nê yê: Mehmet Emîn Levent (21), Saîd Çagdavul (19), Mihemmed Tahîr Yaramiş (pitê 35 rojan), Cemîle Çagirga (13), Osman Çagli (18), Meryem Sure (53), Ozgur Taşkin (20), Seyîd Eşref Erdîn (60), Zeynep Taşkin (18), Maşallah Edîn (35), Sayîd Nayîcî (17), Selman Agar (10), Bunyamîn Îrcî (15), Mehmed Dîkmen (70), Mehmed Erdogan (75) û Mehmed Emîn Açik (70). Seba ke taxa Nurî de teqayîşî estbî, hûmara merdeyanê ucayî hema tesbît nêbîyo. Coka beno ke na hûmare bena girse, çike hîna xeylê dirbetinî nêweşxane der ê.
Kuçeyê Cizîre bi mermîyan pirr ê. Bitaybetî taxa Nurî ke hedefo bingeyên ê hêzanê tirkan bî, maneno ro cayê cengî. Tîmê taybetî û eskeranê tirkan hende gule û topî eştî ke hema-hema her ban zerar dî. Rayan de barîkatî estê. Cizîreyijan ke derheqê rewşa xo de qisey kerd va ke “Her şewe vengê topan ame. Ma besenêkerd ke vejîme teber. Eke ma vejîyayîme, ma bîyîme hedefê nîşandaran. Heta şodir ma besenêkerd ke rakewîme, ma rastê wehşetî bîyîme.” Seba ke îhtîyacê xo nêame dîyene, şarî pê xortuman wasîtayan ra benzîn vet ke pê ney jeneratoran bigurêno.
Leyla Îmret WEzîfe ra cêrîyaye
Yewna netîceyê hewanayîşê abluka o bî ke sereka şaredarîya Cizîre Leyla Îmret hetê wezaretê karanê zereyî yê Tirkîya ra karê xo ra ame eştene. Goreyê wezaretî ra Îmret “propagandaya terorî” kerda. Wexto ke Îmret amebî weçînitene, aye % 83 ê rayan girewtbî. Bi 27 serran kurda ke Almanya de bîye pîle, sereka şaredarî ya tewr cênce bîye. Nika Îmret dewa kerde ra ke wezîfeyê xo peyser bicêro.
Derheqê rewşa Cizîre de Îmret nîya qisey kerd: “Tîya de werdê domanan ra heta xida îhtîcayê her çîyî esto. Banî rijîyayî, veşnîyayî. Ma hetê şarê xo ra dayax pawenîme. Bitaybetî seba domanan desteko psîkolojîk lazim o, çike nê rojanê peyênan de înan tîya de ceng dî, drama dîye.”
Se bîbî?
4. êlule 2015, saeta 20:00 de dewleta Tirkîya seba Cizîra Botanî qedexeyê tebervejîyayîşî nabî ro. Hetê HDP ra di heyetî ameyî rusnayene Cizîre. Nê heyetan mîyan de xeylê parlamanterî estbîyî. Roja hîrêyin a ablukaya Cizîre de Rayîro Serek ê Îdîlî de yew xorto kurd bi nameyê Saîd Çagdavul hetê hêzanê asayîşî yê tirkan ra ame kiştene. Pêro pîya, nê new rojanê abluka de bi desan sîvîlî hetê hêzanê tirkan ra amebîyî kiştene, tede yew pitê 35 rojan û kokimê 80 serran zî. Serekwezîrê Tirkîya Ahmed Davutogluyî vatbî ke “Cizîre de qet yew sîvîlî canê xo nêda.” Ney ser o parlamenterê HDP ê Şirneî Faysal Sariyildizî Twîtterî ser o nameyê sîvîlanê ke kişîyayî dayî zanayene. Hemserekê HDP Selahettîn Demîrtaşî Cizîre de qisey kerd va: “Qanûn ra gore cezaya tebervejîyayîşî 100 TL a. Cizîre de cezaya tebervejîyayîşî merden a.”
“Cizîre de cezaya tebervejîyayîşî merden a”
