Serekê Herêma Federal a Kurdîstanî Mesûd Barzanî derheqê şerê mabênê Tirkîya û PKK de îzahato resmî weşana. Vilaweka xo de Barzanî vano ke gerek her di hetî, Tirkîya û PKK, fek çekan ra veradê û pîya seba aştîye bigureyê.
Barzanî ra gore nê serebûtê peyênî tarîxê kurdan de çîyêde newe nîyo. “Se serrî yo ke ma sey kurdan duştê zulm û zordarî de şer kerd. Ne ma besekerd rastîye bivurnîme ne kî înan besekerd ma kok ra bîyarê. Seba naye ma ameyîme na rastîya ke şer qet fayde nêkeno û gerek ma faydeyê xo pêro îmkananê aştîye ra peyda bikerîme.”
[pull_quote_left]”Gerek PKK û Tirkîya bêrê têlewe”[/pull_quote_left]Dewamê vilaweke de Barzanî va ke hukmatê Herêma Kurdîstanî, çi ke destebera ame, o kerd ke şer nêvejîyo. Hukmat hêvîdar bîyo ke prosesê aştî yê Tirkîya do serkewte bo û coka hem PKK hem kî hukmatê Tirkîya rê da zanayene ke seba naye ardimê xo pêşkêş kenê. Barzanî ra gore gerek prosesê aştîye dewam bikero û kurdî bibê wayîrê heqanê xo.
Fikrê Barzanî ra gore AKP kurdan rê xeylê heqî dayî, coka muhîm bî ke bingeyê prosesêde aştî yê Tirkîya dirust bibo. “Seba naye ma waşt ke Partîya Karkeranê Kurdîstanî beşdarê muzakeran bibo û birêz Ocalan kî sey heto sereke seba rakerdişê muamele û resayîşê aştîye parçeyê ci bo. No kî raverşîyayîşo zaf muhîm bî.” Boyna, Barzanî va ke bi qenaetê ey, HDP seba aştîye û çareserkerdişê mesela kurde parçeyêde muhîm o. “Bitaybetî dewleta Tirkîya û birêz Ocalan û Partîya Demokratîk a Şaran (HDP) sozdarî û girêdayîbîyayîşê xo seba nê prosesî û raverberdişê ci bellî kerd. Coka ma hêvîdar bîyîme ke proses astengan bivîyaro û ma amadekarîya xo seba her hetkarîya her hetî pêşkêş kerdbî. Nika ma kî wazenîme ke proses reyna dest cibikero û şaro kurd bi heqanê xo şa bibo û asayîş û aramî peyda bibê.”
[pull_quote_right]”Ma ne seba sîyasetê Tirkîya ne kî seba sîyasetê PKK berpirsîyar îme.”[/pull_quote_right]
Derheqê şerê nikayinî de Barzanî vano ke o bi xo pê xemgîn o. “Derheqê vînayîşê Tirkîya û PKK de kî, ma ne seba sîyasetê Tirkîya ne kî seba sîyasetê PKK berpirsîyar îme. Destê ma de tena ardimkerdişê înan seba muzakeran û nêzdîbîyayîşê yewbînan esto. (…) Çend reyî mi seba PKK mesaj rusna ke bisebr û zerrîhîra bimano. Mi înan rê da zanayene ke bi kiştişê di polîsanê Tirkîya, çareserîye ancîya kewte peynîye. Gerek bi sindoqanê weçînitişî, bi qeleme, bi dîyalog, bi sîyaset û bi xebata aştîyane dewam bikero. (…) Qet rey bi raya çekan teba nêvejîya. Nika kî ma bawer îme ke HDP û AKP raye bivînê û Tirkîya de hukmatêde newe virazê ke seba kurdan û pêroyê Tirkîya netîceyêde zaf rind vejîyo meydan.”
Seba Barzanî, dişmeno muşterek DAÎŞ o. Hukmatê Herême hîna vano ke dewleta Tirkîya xeletîye kerde û HDP û Ocalan dawetê qiseykerdişanê aştîye nêkerd. Badê cû, Tirkîya do mecburî bi Ocalanî muzakeran bikero.
Peynîye de, Barzanî va ke o pê şidetê nê rojan zaf xemgîn o. Barzanî ke hem AKP hem kî PKK rexne keno, vano seba ey meseleya kurde tewr muhîm a. “Ez şerî rind nêvînena û qet wext hetê şerî kî nêkena. Coka sîyasetê PKK ser o xeylê şîroveyê mi estê, bitaybetî mudaxeleyê înan kar û barê Herêma Kurdîstanî ser o û ecizkerdişê partîyanê bînan ê Rojawanî ser o. Labelê hetê mi ra dewaya şarê kurdî her çî ser o yo.”
