Hêrişê Pirsûsî Kurdîstan û dinya de şermezar beno

Hêrişê bomba yê Pirsûsî ke tede 31 kesan heyatê xo dayî, xeylê cayanê Kurdîstanî û dinya de şermezar û protesto beno. Zafê protestokerdoxan hukmatê Tirkîya û terorîstanê DAÎŞ sucdar kenê û nîya sloganan erzenê.

Dêrsim de bi des hezaran kesan hêriş protesto kerd. Protestokerdoxan Kuçeya Hunerî ra ver bi Meydanê Azadîye şîyê. Çalakîye de parlamenterê HDP Edîbe Şahîn û Alîcan Onlu, hemserekê şaredarîye Nurhayat Altun û Mehmet Alî Bul, serekê şaredarîyanê qezayan û rêxistinanê bînan ê sîyasîyan ra xeylê temsîlkaran cayê xo girewtbî. Esnafî kepenkê xo cadayî. Protestoyî de sloganî sey “Qetile DAÎŞ, hemkare AKP”, “Şên bo şorişê Rojawanî” û “DAÎŞ kişena, AKP seveknena” ameyî eştene.

“QetilE DAÎŞ, Hemkare AKP”

Dîyarbekir, Colemêrg, Şirnex, Sêrt, Bismil û Farqîn de kî kurdan hêrişê Pirsûsî protesto kerd. Riha de mabênê protestokerdox û polîsî de pêrodayîş vejîya, polîs bi gaz û awe mudaxele kerd. Sey netîce, walîyîye pêro kombîyayîş û nûmayîşî qedexe kerdî. Şaristananê Tirkîya û Ewropa de ke tede kurdî ciwîyenê, uca de kî protestoyî organîze benê. Bi seyan kesî hêrişî şermezar kenê.

Partîyanê sîyasîyan kî xeberî weşanayî ke tede hêriş bi giranî şermezar kenê. Hemserekê HDP bi heyetêk ewro saeta 19:00 de şono Pirsûs de dirbetan zîyaret bikero. Verê, Demîrtaş û hemsereke Fîden Yuksekdag pîya yew îzahat dabî, tede vatbî HDP do tedbîranê xo yê asayîşî bicêro. “Heya, no serebûtêde zaf dejdaye yo, teberê însanîye der o, ma ver bi qetlîamêde wehşî û barbarkî der îme. 32 gencê ma yê zem-zelalî, zafê înan wendekarê unîversîte, wendekarê tib, huqûq, sosyolojî, psîkolojî bîyê. (…) No dej zaf girs o, la ez ney şima ra vana: netîceyê ke qetlîamî ra dime yenê dîyene û hêrişê ke ver bi partîya ma yenê kerdene, ê kî sey nê qetlîamî dej danê,” Demîrtaşî va.

Hetê Cemîl Bayikî, hemserekê heyetê îdareyî yê KCK, ra kî hêriş şermezar bî. Bayikî ra gore no hêriş qetlîamo muşterek ê AKP û DAÎŞ o. “AKP ya ke DAÎŞ weye kerda arda nê halê ke bîyê naxirê qetilan. Qetlîamê Pirsûsî ke duştê gencanê şarê ma de ame kerdene, hêrişo muşterek ê AKP û DAÎŞ o,” Bayikî va. Fikrê ey ra gore no beno mahana AKP ke Rojawan de mintiqaya tamponî bivirazo. Pêşnîyaza Bayikî ra gore gerek kurdî xo rê yew sîstemê xoseveknayîşî bivirazê ke ver bi nê tewir qetlîaman de bivejîyê.

Serekîya Herêma Federal a Kurdîstanî kî vilaweke weşanaya ke tede hêrişê terorîstî yê Pirsûs lanet beno. Ancîya, serekîye keyeyanê şehîdan rê serweşîye waşte. Tede va: “No kerdişê terorîstî demê de ke DAÎŞa ke duştê laj û kênayanê kurdan de şer kena û her roje parçeyê Rojawanî înan ra pak beno, o dem der o. (…) Nêbeno ke nê tewir karî bibê sebebê kêmîbîyayîşê moralê berz ê şarê ma.”