Netîceyo peyên ê weçînitişê 2015

%99,98 yê sindoqan hûmarîyayî, netîceyo peyên ê weçînitişê 2015 vejîya. Herçiqas ke hîna tam resmî nîyo, vurnayîşê girsî texmîn nêbenê. 

Netîceyo peyên ra gore, Partîya Demokratîk a Şaran (HDP) bitaybetî Kurdîstanê Vakurî ra parlamenteran vejena. Partîya îqdîrarî AKP bi %40,8 yê rayan 258 parlamenteran vetî. Dîyin partîya komarpereste CHP ameye: %24,9 yê rayan bi 132 parlamenteran. Partîya rastgira tirkpereste MHP bi %16,2 80 parlamenteran rusnena parlemento. HDP kî %13,1 yê pêro rayan girewto û nîya bi 80 parlamenteran meclîs de ca cêna. Partîyê bînî dorê %5 der ê.

Bi nê netîceyî AKP îqtîdarê 13 serran kena vîndî û mecbur manena ke koalîsyon rono. Gerek ke 45 rojan de hukmat bêro ronayene. Nêke, serekkomar besekeno newe ra weçînitişan bido viraştene. Ancîya, hedefê AKP ke %60 yê rayan bicêro, dûrî de mendo. Reaksîyonê Tayyîp Erdoganî o bî ke qerarê şarî rê hurmetê ci esto. Serekwezîrê partîye Ehmed Davutogluyî derheqê netîceyê weçînitişî de qisey kerd va ke her çî ra raver AKP no weçînitiş de sey partîya verêne ameye. Serekê pêroyî yê CHP Kemal Kiliçdarogluyî vilaweka xo de da zanayene ke pê nê weçînitişî dewrê Erdoganî rijîya. Partîya MHP ra Dewlet Bahçelî kerd eşkera ke ê hîna miletperestîya xo parlamento de temsîl kenê. Bahçelî ra gore koalîsyono bimantiq mabênê AKP û HDP beno.

Hemserekê HDP Selahettîn Demîrtaşî Îstanbul de derheqê serfirazîya partîya xo de qisey kerd va ke pêro şarê Tirkîya ke pelixîyenê, nika kewtî ser. “No zafer zaferê aştî, azadî û edaletî yo. Ma onurê nê zaferî heq kenîme. Yew netîceyo muhîm ê weçînitişî kî o yo ke fênda AKP ke ‘mesela kurde çin a, muzakere çin o’ bîya sifir. Înanê ke rayê xo emanetê ma kerdê, ma şima pê şermezar nêkenîme. Ma sozê xo da, ma ne zere ra ne kî teber ra AKP de pîya koalîsyon nanîme ro.”