Xebera BasNewsî ra gore, endamê Kongreya Neteweyî ya Kurdîstanî (KNK) Mihemed Emîn Pêncwênî da zanayene ke partîyê PKK û PDK-Î bi mabênçîya hukmatê Herêma Federal a Kurdîstanî kombîyayîş virazenê.
Seba ke problemê mabênê nê di partîyanê kurdan de hel bibê, hukmatê Herêma Federal a Kurdîstanî kewt mabên ke mesele aştîyane çareser bibo. Na game hetê Pêncwênî ra rind vînîyaya, BasNewsî rê va ke “Na seba çareserkerdişê mesele gamêda pozîtîf a”. Netîceyê kombîyayîşî do nêzdî de bêrê weşanayene. Vizêr heyetê PKK hema amade nêbîbî û coka kombîyayîş herey dest kerd ci.
Roja 24. gulane de mabênê gerîlayanê PKK û pêşmergeyanê PDK-Î de hetê Kêleşînî de ke sînorê Kurdîstanê Başûrî û Rojhelatî der o, uca têkewtişo wextkilm qewimîya. Tede pêşmergeyê PDK-Î bi nameyê Qadir Kerîmî bî şehîd, hîrê pêşmergeyî kî bîyî dirbetinî. Parlamentoyê Herêma Kurdîstanî ney ser o vilaweke weşanabîye û partîyî îqaz kerdî ke meseleya xo bi çekan ney, wa bi hewayê aştî çareser bikerê. Eynî dem de parlamentoyê Herême xo sey mabênçî pêşkêş kerdo.
