Çeteyanê rêxistina terorîste yê Dewleta Îslam yê Îraq û Şamî (DÎÎŞ) mintiqaya Serê Kaniyê yê Kurdîstanê Rojawanî de hêrişê dewan kerd. Melumatanê verênan ra gore înan tewr tay 15 kesî -tede cinî û domanî kî – qir kerdî.
Muxabîranê Ajansê Xeberan a Firatî (ANF) ra gore, çeteyanê DÎÎŞ Serê Kaniyê de dewanê Tilelîye, Temade û Ovencake de hêrişê mezrayan kerd. Hûmara merdeyan hîna ke bellî nîya, şar vano ke bi desan kesî amey kiştene. Melumatanê verênan ra gore meyîtê 15 kesan, tede 7 domanan, amey dîyene.
Resimê ke mintiqaya qetlîamî ra yenê, xeylê meyîtanê cinî û domanan musnenê. Şarî ke meyîtî bar kerdî wasitayan, amey dîyene ke tayê meyîtî giran parçe bîy. Zafê dewan ra hîna dû vejîno, dewijî ceribnenê ke biremê.
Hêrişê DÎÎŞ ra tepîya hêzanê YPG mudaxele kerd. Dewanê Til Xenzir û El Rewîye de pêrodayîşê şidetinî vejîyay û hîna dewam benê. Derheqê netîceyê pêrodayîşî de hîna melumatê qetîyî çin ê.
