Kurdê ke 77 serran ra raver hetê dewleta tirke ra Dêrsim de ameybî qir kerdene, emser Halvorî de amey yad kerdene. Halvorî de ke nêzdîyê çemê Mizurî yo, eskeranê tirkan 1938 de bi hezaran kirmancî uca verê çekanê makîna de rêz kerdîbî û tepîya eştîbîy çemê Mizurî.
Dorê 1.000 dêrsimijî 4. gulane de Halvorî de amey têlewe û no jenosîd yad kerd. Hemserekê beledîyaya Mamekîye Mehmet Alî Bul û hemsereke Nurhayat Altun tey cayê xo girewt. Seba merdeyanê jenosîdê Dêrsimî çilayî fîyay ra ci, nîyaz vila bî. Pîro kirmanc Welî Yildizî kî bi kirmanckî şiware vat. Xeylê kesî hukmê hesîranê çimanê xo nêbîy.
1937 û 1938 de Dêrsim de dewleta Tirkîya 50.000 ra zêde kirmancî kiştîbî. Bi hezaran kesî rusnaybî surgun û xeylê domanî werteyê keyeyanê tirkan de vila bîyêne. No qirkerdiş ra tepîya jenosîdî bi qedexekerdişê ziwan, kultur û îtîqadî dewam kerd. Ziwan, kultur û îtîqadê kirmancan bi polîtîkaya taybetî ya asîmîlasyonî ra amey vurnayene. No jenosîd hete dewleta Tirkîya hîna qebul nêbeno û sîyasetê asîmîlasyonî bi lerze dewam beno.
