Nîjadperestê tirkî hertim nîya vanê:
– No roşanê 23. nîsane roşanê domanan o û tenya bi xo ser dewleta ma de esta. 94. serrî yo ke ma no roşan bimbarek kenîme. Domanan benîme makaman de danîme roniştene. Ma henî domanan ra hes kenîme ke domananê pêroyê dinya anîme kenîmê tabîyê nê roşanî.
Ero bira, termînolojî de fedîkerdiş û şerm esto. Merdim wexto ke tenê fedî bikerê, zaf rind o. Labelê şima de fedîkerdiş û şerm çin o.
Ero lawo, şima se serra domanan her şodir şefaq de verê çeweranê qişlan de rêz kenê û belengazê domanî bi ricf sond wanenê û şima danê wendiş û vanê:
– “Varlığım Tirk varlığına armağan/kurban olsun…” ( Estena mi qurbanê estena tirkan bo)
***
Terteleyê Dêrsimî de qirkerdişî ra dimê domanî ke mendî, şima guretî vila kerdî û werte ra kerdî vîndî. Demo nêzdî de, domanê ke zindan de bîy, domanê ke mektebanê rakewtî û esirxanan de bîy, çîyo ke serê ê domanan de şima ardo, heq serê dar û kemerî ro nîyaro. Çîyê ke şima serê domanan de ardo, zonê merdimî nêcêreno ke merdim bîyaro zon.
Îşkence, zulm, tecawiz … hed û hesabê xo çin o.
Reyna demo nêzdî de qirkerdişo ke serê domananê kurdan de amo ramitenê, heq serê dar û kemerî ro nêvarno.
Demo nêzdî de Ugur Kaymaz polîsan kişt, cesedê ê domanî de des û hîrê qerşunî vecîyay, o bi xo jî duwês serre bî. Ceylan Onkol jî duwês serre bîye û parçeyê cesedanê aye pêşanê maya aye de şî doktoran û dozgeranê şima rê. Berkîn Elvan duwês serre bî û bi gulanê bomba gazî ame kiştiş. Serekwezîrî mîtîngê weçînitişî de dayîka ey masumî terorîst nîşan de û heqaret kerd.
Qetlîamê Roboskî de şîyês domanî tede hîrîs û çar kesî amey qirkerdiş.
Nê qetlîamê ke mi bi kilmek name kerdê, tewr jû de heq û huqûqî tecelî nêkerd û tek jû qatîlî ceza nêgureta û nêkewto zindan. Dewa nê qetlîaman mahkeme bi mahkeme çarna, xeçelnayîş û kaykerdiş ser o amo hole, kese ke wayîrê dewan ê, serê dînan ro jî heqaret çeşît bi çeşît ame kerdiş.
Ero termînolojîya şima de, ehlaqê şima de fedîkerdiş, şermayene qe çin a eceba?
Heya lo, ez rind zana: zuro girs, zurekerdişo bêbinge encax honday beno.
