Di rojî weçînitişê cayî yê Tirkîya ra ver, ancîyo qeydêde bîn ê vengî vejîya meydan. Na rey qeyd ser o wezîrê karanê teberî Ahmet Davutoglu, musteşarê MÎT Hakan Fîdan, musteşarê wezaretê karanê teberî Ferîdun Sînîrlîoglu û sererkano pêroyî yo. 2. Yaşar Guler heşînê.
Qiseykerdişê nê çar merdimanê dewlete de yeno vatene ke ê seba hêrişkerdişê Sûrîye û bitaybetî Kurdîstanê Rojawanî bahane cêrênê. Vanê, “Eke ma rê bahane lazim a, ezo çar merdiman rusnena uca, heşt teneyî fuzeyan kî erzena warêde tal. Problem nîyo, bahane virazîna.” Qiseykerdiş de behsê tirbê Şah Silêmanî beno, tirbê Şah Silêmanî erdê Tirkîya yo ke mîyanê sîndoranê Sûrîye de maneno.
Roja bîne serekwezîr Tayyîp Erdogan û wezîrê karanê teberî Ahmet Davutogluyî day zanayene ke no qeydê vengî rast o, labelê muhtewa ameye vurnayene. Qeydê vengî ke YouTube ser o vejîyaybî, çapemenîya Tirkîya û dinya de bî namdar. Weşanayîşê qeydî ra dime platformê vîdeoyan YouTube, kî sey Twîtter, Tirkîya de ame qedexe kerdene.
Zafê parçeyê qeydî rind yenê heşnayene, ge-ge tayê qisiman de problemê vengî estê. Labelê parçeyo muhîm ê qeydî nîya r’ o:
Deqaya 3:03, Ahmet Davutoglu: Werteyê ma de bimano, serekwezîrî mi ra va ke gerek ma naye [hêrişê tirbê Şah Silêmanî] sey îmkanê nê konjekturî bivînîme.
Dq. 3:07, Hakan Fîdan: Nika nîyadêne, birêz fermandar, eke ma rê bahane bo, ezo heto bîn rê çar merdiman rusnena, heşt teneyî fuzeyan kî erzena warêde tal. Problem o nîyo, bahane virazîna. Mesela a ya ke îradeyo nîyanên bêro ronayene. Ma do îradeyo cengî ronîme, labelê ma sey hertim boyna nêfikirînê.
Dq. 3:27, Ferîdun Sînîrlîoglu: Ezo nika naye vajî: a erazîya 10 doniman a. Uca de 10 donimî erdê welatî huqûqê mîyanneteweyî de gerekîyêda zaf pêt a. Aye ra kî dot, na seba operasyonê duştê ÎŞÎDî [Dewleta Îslamî ya Îraq û Şamî] de meşrûîyet o; pêro dinya hetê ma kena. Qet teredûtê ma tey çin o.
Dq. 3:43, Yaşar Guler: Qet teredûtê ma tey çin o.
Dq. 3:44, Ferîdun Sînîrlîoglu: Ney, ez şima pêrune ra vana. No mewzû de yanî.
Dq. 3:46, Yaşar Guler: Yanî, hêzê ma yê ucayî yew serre pawenê, birêz wezîr. No tedbîro ke mi vizêr girewto, nîyo. Yew serr a ke merdimî uca r’ ê.
Dq. 3:55, Hakan Fîdan: Ma çayê Şah Silêmanî pawenê? Mi aye fehm nêkerd..
Dq. 3:58, Ahmet Davutoglu: Hetê dîplomatîkî ra ma her çî kerd.
Dq. 4:02, Ferîdun Sînîrlîoglu: Bahane lazim a, bahane.
Dq. 4:03, Hakan Fîdan: Ez bahane hel kena. O problem nîyo ke!
Dq. 4:03, Ferîdun Sînîrlîoglu: Ney, viraştişê bahane çîyêde bîn o. Ma rê bahanêda zaf pête lazim a.
Dq. 4:07, Hakan Fîdan: Eke icab keno, ma uca (Tirbê Şah Silêmanî de) yew hêriş bîyarîme ca (….).
(Resim: Sean Venn)
