Des hezarî mîtîngê BDP ê Dêrsimî de

Mîtîngê weçînitişî yê BDP ê Dêrsimî de bi hezaran kesî amey têlewe. Kombîyayîşê ke Meydanê Seyîd Rizayî de ca girewt, namzedanê beledîyaya Dêrsimî propagandaya xo ya weçînitişî daye zanayene. Texmînan ra gore dorê des hezarî kesî amey.

Sloganê weçînitişê beledîya yê 30. adare na rey bi kirmanckî “Ebi rayberîya xo sonîme kamîya xosere” bî. Mîtîng de namzedê hemserekîya BDP, sereka beledîyaya Dêrsimî Edîbe Şahîn, hemserekê pêroyî yê BDP Selahattîn Demîrtaş, hunermend Ferhat Tunç û partîyanê BDP, HDP û ESP ra kî xeylê sîyasetmedarî beşdar bîy.

Qiseykerdişê xo de hemserekê pêroyî yê BDP Selahattîn Demîrtaşî muhîmîya weçînitişê 30. adare nîşan da va ke no tena weçînitişê beledîya nîyo. “Tabî ma do sermîyanîya beledîya newe ra weçînîme. La manayê bînî yê nê weçînitişî kî estê.” Boyna, Demîrtaşî derheqê dêrsimijan de qisey kerd û dima sîyasetê partîya CHP rexne kerd. “Ronayîşê CHP ra bi nat Dêrsim de problemî estê. CHP Dêrsim ra çi wazena? Dêrsim de çi çareser kerd? Eke şima nê 91 serran de her serre yew problem çareser bikerdêne, Dêrsim nika bibîyêne Parîs. (…) Rindîya tewr girs a ke CHP besekena Dêrsim rê bikero, a ya ke Dêrsim caverdo dêrsimijan dest. CHP çimeyê problemanê Dêrsimî yo, AKP kî formêde bîn ê naye yo.”

Qiseykerdişê Demîrtaşî ra tepîya sereka beledîya Şahîn û namzedê hemserekîye Atlun û Bul amey sahne, mîtîng qedîya.