Ukrayna fermanê peyserantişê leşkeranê xo girawa Kîrîmî ra da. Leşkerî û keyeyê înan yenê texlîye kerdene. Herçiqas ke têkewtişê artêşan çin bî, atmosfer hîna girîno.
Bi qerarnameyê parlamentoyê Ukrayna, serekkomar Aleksander Turçînovî da zanayene ke leşkerê artêşe û keyeyê înan semedê “tehlukeyê ciddî” Kîrîm ra peyser ancînê. Ser o kî erkanê pêroyî yê Ukrayna vilaweka xo da va ke xeylê leşkerê artêşa Ukrayna semedê tedaya girse ra firar bîy şîy hetê artêşa Rûsya. Goreyê melumatê general Aleksander Rosnansînî, nêmê leşkeranê Ukrayna hetê xo vurna.
Hewteyo verên Rûsya duştê pêro protesto û mueyîdeyan de parlamentoyê xo de qerarname vet ke girawa Kîrîmî bibo parçeyê Rûsya. Serekkomar Vladîmîr Putînî qanûnê nîyanênî îmza kerdî. Goreyê qanûnê Rûsya ra girawa Kîrîmî nika parçeyê Rûsya yo. Roja dişemîye ra dime kî Kîrîm de dovîzo resmî bî Rubel, alayê Rûsya yenê aliqnayene.
Sey netîce Ukrayna û Yewîya Ewropa Bruksel de qerarê hemkarîya sîyasîye da. Rûsya kî îxracatê xo yê gazî seba Ukrayna kerd tenêna vay.
