Ewro, roja 16. adare 2014, serrgêra 26. ya qetlîamê Helebce Kurdîstan de ame protesto û yad kerdene.
Şarê Helebce kincê sîyayî xo rê day û verê beledîya ra heta Goristanê Şehîdanê Helebce şîy. Pêro Kurdîstanê Başûrî de saeta 11 de her çî amey vindarnayene û miletî 5 deqayî bê lewîyayîş qetlîam yad kerd. Dima, bi qerarnameyê Hukmatê Herêma Kurdîstanî xo dest de ke Helebce sey qeza îlan keno, nûmayîşî dest kerd ci.
Vakurê Kurdîstanî de kî xeylê şaristanan de qirkerdişê Helebce ame protesto kerdene. Bi hezaran kesan kuçeyî kerdî pirr. Dîyarbekir de hetê BDP û DTK ra nûmayîş ame viraştene, tede ame waştene ke qetlîam sey jenosîd bêro qebul kerdene. Namzeda hemserekîya şaredarîya şaristanê girsî Gultan Kişanak qiseykerdişê xo de va ke “Ma sey rêxistino ke bi nameyê şarê kurdî sîyaset keno, qetlîma Helebce şermezar û nalet kenîme. Ma do hesabê nê qetlîamî pers bikerîme. (…) Helebce dezê zerrîya ma pêrune yo. (…) Ma wazenîme ke no qetlîam sey jenosîd bêro qebul kerdene.”
Aye ra kî dot qirkerdişê Helebce Cîzîre, Semsûr, Çewlîg, Riha, Bismîl, Meletî, Êlih, Hêni, Roboskî û xeylê cayanê bînan ê Kurdîstanî de protesto bî. Komela Newe Viraştena Dêrsimî kî vilaweka xo de qirkerdişê Helebce şermezar kerd.
16. adare 1988 de rejîmê Baasî şaristanê kurdan Helebce bi çekanê kîmyewîyan bomba kerdîbî. 5.000 kurdî – cinî, camêrd, domanî – bi dez û şidet ameybî kiştene.
