RİSQÊ BÊ KAMÎYE

Şîfreyê, ‘tilsimê’ dewleta Tirkî, seba ma no yo. Ez zen kena ke, zaf kesî, nê ‘tilsimî’ fam nêkenê. No ‘tilsim’, seba çepgîran zî ‘minasîb o’. Çepgîrî zî, felsefeyê xo, xizanîye û ekonomî ser o nê ro. Coka ke dewleta Tirkî serran bi serran vana ke; ‘teror ke me bo, fabrqayî, rayî, mektebî virazînê, şima benê rehet, benê mird’. Bê şik ‘teroro ke qal kenê, kamîya ma wa. Bi vateyêde bîn; ‘dawa kamîya xo, rastîya xo mekerê, ma her çî danîme şima’. Yanê no, zaf zur zî nîyo.

Bi nê mantiqî, hukumatê Tayîb Erdoganî, Çewlig de, tîyare na ro, meydanê tîyareyî viraşt. O ca de, qesî kerd. Zaf kesî zî dorme de bî, çepikan dayî piro, ey goynayî, pesênayî. Çewligo ke tede Tirk çîn o.

Ma no senên hal o ke Tayîbî, û dewleta Tirkî goynenê? Dewleta Tirkî, ebe îmkan û ekonomîyê xo, xizantîye û feqîrîya şarê ma, kerda binê bandura xo, şarê ma kerda makumê mantiqê xo.

Çimê felegî kor bo ke, ma hîna 2013 de dima Tayîban û aybê înkarcîyan şonîme!

Xo ra qaşo sîyasetmedarê ma zî endî ebe dewleta Tirkî, tayê zî, kenê ‘çilo-pilo, bîyê tabîyê entegrasyonî.

Luzumê ajîtasyonan çîn o! Bi Tirkî ‘yaşasin û kahrolsun’! Fayde nêkeno!

Xora nê ajîtasyonê çepgîranê bi Tirkî zî, ma xêylî kerdîy asîmîle!

Ê zî ajîtasyonan danê ma, kamîya ma, ma ra durî kenê, xêylî zî kerdî. Waxtê serebutê Taksîmî ke mi nusnabî vatbî, ‘taksîm-maksîm fîlim o, ma eleqedar nêkeno’, tayê kesî, qaşo seba ke ez ‘biratîya şaran nêwazena’! Mi ra reqne kerdêne. Çarşeme ra kifş o ke panşema yêno. ‘Pancşeme ame, taksîm qedîya’ ma nika?

Emrê ma, sîyaset ra, deq û dolabanê sîyasetî ra vîyart. Ez endî ‘bîya bêzar’! Zaf nêwazena qalê sîyasetî bikerî. Ez wazena qalê rastîya ma, zonê ma, kamîya ma bikerî, la îta de zî, sîyaset o qilêr ma ser o kay keno. Vanê ke ‘zon, kamîye, kultur’ sîyaset nîyo.eke rast o, şima zon, kamîye û rastîya ma ra çi wazenê? Eke henî yo, welatê mi de qey ju mekteb bi zonê ma ra çîn o?

Êh! Îta de ‘guna ma zî’ şenike nîya!

Serran ra ver, ju numayîş  o ke babeta xo, ‘biratîye û hastîye bî’ mi wast ez qesî bikerî fikrê xo vajî. Se ke mi bi zonê ma qesî kerd, perune se ke ‘ju xeybanîye’ dîbîy, erişê mi kerdî. A roje ra nata, mi mantiqê ‘çepgîran zî, rastgîran zî’ rind fam kerd. Dawa kamîye û zonî de ‘çepgir, rastgîr, liberal, radîkal û marksîzmîye’ çîn a. Na rastîye rind bizanime û goş medime fîliman.

Zon û kamîya ma perîşan o, perîşan! Hazar tîyare Çewlig de rone zî se beno? İta de nîyet xirab o. Kes ‘ma ra hes nêkeno’. Her kes seba menfaatê xo yo. Ma menfaatê ma?

Meydanê tîyareyî Çewlig de ra ke, mektebanê Tirkan ra ke, fabrika zî ra ke, kar û xebat zî bide, kamîye bige!

Risq, bi zon û kamîye rast o.

Risqo ke kamîye wazeno bigêro, o risq, bê heysîyat o.

Guna wo, ayb o, şerm o, serra 2013 î de hîna  kamîya ma, zonê ma qedexe yo. Ê yê ke Tayîbî ra Çewlig de çepikan danê piro, na rastîye zanenê? Feqîr û xizantîye şerm nîyo, la seba risqî, parskerdoxê înkarcîyan bîyene, şerm o.

‘Qorîcîyan’ bifikirê!Seba peran şarê xo kişenê!

Tenya ebe  çekan  ney,ebe  fikirî zî ‘qoricîtîye’ esto. To fam kerd ‘birayê minê çepgîrî’ yo ke bîyo Tirk, zon û kamîya xo ra durî kewto?

To fam kerd, ‘birayê minê’ ke akp û chp şeveknenê?

To fam kerd ‘roştîbîrê ninê kibarî’ yê ke zonê Dinya aleme zanenê, la zonê xo nêzanenê û nêwazenê bizanê.

Ney, to fam nêkerd, çi ke derdê to kamîya to û heysîyat nîyo’

Ney, to fam nêkerd, çi ke ez îta de bi zonê ma nusnena, no ‘risq nêdano to’!

‘Risqê bê kamîye’ mi va!

Lanetî piro şoro!

Îlhamî Sertkaya

12 -7-2013

(Resim: FreedomHouse2)