Ma çiqas bêveng vinderîme honde kî asîmîle beme. Ma çiqas bêveng vinderîme honde kî zulmkarî rê ma zulm kenê. Yanî, ma verba nê zulm de çiqas bêveng vinderîme honde kî zon û kulturê xo ra kume dûrî. Naye ra gore kî vengê xo wext ra berz kerîme. Nê zulmê nînan ra ma waxt ra para xo gurete, la gere ma xo nê zulmê asîmîlasyonî ver şanîme ke wa domanê ma kî pencanê asîmîlasyonî ver nêkuyê.
Seke yeno zanitene, naye ra çand heştî aver medyaya kurdan de oncîya zê her wextî xebara asîmîlasyonî rêza juyîne de cayê xo guretîbî. Tawo ke mi na xebere sosyal-medya de wende, honde mi rê eceb nêameye. Çunke her kes kî rind zano ke Tirkîya de polîtîkaya înkar û asîmîlasyonî hona-hona kî dewam kena. Her çiqas ke hukmatê AKP vaco êndî çîyê nîyanênî çin ê kî bi na weqeta mektebê Gimgimî reyna rind ame zanitene ke înkar û asîmîlasyon dewam keno. Hem kî cayê zê Gimgim de û bi zanitene dewam keno.
Hela bêrêne nîya dêne, hela bêrêne safî kerêne ke malimê dewlata tirke bîye zeher û ziqim mekteban de domanan asîmîle kenê. Tawayê nînan û dersa tirkî dayene çin a, nê bi zanitene dersa asîmîle kerdene danê.
Raştî kî kes hayrê verê perwerdeyê mektebanê dewlata tirke nîyo. Cayê zê Gimgim de hona-hona kî asîmîlasyonê zonî bi zulm û bi zordarîye dewam keno. Naye ra gore ke mordem hesab û kitabê asîmîlasyonê zulmkaran bikerone, zîhnîyetê asîmîlasyonî hukmê xo, zulmê xo û zordarîya xo bi hukm hona kî dano dewam kerdene.
Hela bêrêne nîyadêne ke ewro kî çêna ê asîmîlekerdoxan bîya malime û panoyê sinifa ju mektebê Gimgim ra niya nusnena:
- “Türkçeniz parmak izinizdir” (Tirkîya şima morê bêçika şima wo)
- “Benimle Türkche konuşma” Türkçe konuş” (Mi de tirkhî qesey meke! Mi de tirkî qesey bike!)
- “Türkçemizi koru ona sahip çık” (Tirkîya ma bişeveknê û ci rê wayîr vecîyê)
- “Dilini sev ki vatanını sevesin” (Zonê xo ra hes bike ke welatê xo ra kî hes bikerê)
- “Ya Türkçe konuş ya da sus” (Ya tirkî qesey bike ya kî bêveng vinde)
Yanî malimê dewleta tirke bi no qeyde tirkîya xo ya nazik û kibarî, bi domananê kurdan dana hes kerdene û hemî kî asîmîle kenê.
Heya, ma qey henî nîyo wakila mi, ma qey henî nîyo. Ya ma tirkî qesey keme ya kî xo rê bêveng vindenîme. Bi serran o ke şima na vatene ma ra vanê. Bi serran o ke şima dest no ra fekê ma ser, nêverdanê ke ma bi zonê dayîka xo ju çekuye qesey bikerîme. Bi serran o ke no zulmê şima dewam keno. Bi serran o ke şima asîmîle kerdene xo rê kerda xûye. Bi serran o ke halê ma bi şima nîya r’ o…
Heya wakila mi heya, baw û kalikanê şima kî wext ra nîya vatê û hona-hona kî vanê. To kî payin no ra baw û kalanê xo yê zulmkaran ser. Ma to kî çêna ê asîmîlekerdoxan nîya. Ma to kî ewlada ê zîhnîyetê înkarkerdoxî nîya. Qa derdê şima, qa zulmê şima zulmkaran caran ma vîr ra şono. Eke nîya yeno ra ma vîrî, ca çin o ke ma cikume. Baw û dakila to kî zemanê ma ra “Ya hes kena ya kî terk kena” vatê. Qa welecaxê şima zaf ê, zaf.
Nê zulmê zulmkaran ra ma kî wext ra nasîbê xo guret bawo. Ma ra kî amey vatene nê vatenê nîyanênî. Ma ra kî vatê “Kirmanckî (zazakî) qesey mekerê, tirkî qesey bikerê.” Ma ra kî vatê “Ya tirkî qesey bike ya kî bêveng vinde!” Ma ra kî vatê bawo, ma ra kî…
De ez na torna asîmîlekerdoxan ra se vacî? Belko vacî dîkê ke to mird nêwere…
