Badê ke çar cêncê kurdî Hollanda de hetê rêxistananê selefîyanê ereban ra bi xapnayîş Sûrîye de duştê şarê xo yê rojawanî de dîyay ceng kerdene, Komela Îslamî ya Kurdîstanî (CÎK) venga xortanê kurdan da ke ê raver ra şarê xo rê ke zulm û tenge der o, ardim bikerê. Serekê CÎK Mele Muhîttînî no derheq de qisey kerd va ke “Cêncê kurdê muslumanî verê seba xoserîya şarê xo bigureyê!”
Semedo ke cêncê kurdî bi manîpulasyonê hîs û hişan hetê cîhadîstanê ereban ra amey rusnayene Sûrîye, rexneyê giranî bîy berz. Serekê CÎK Mele Muhîttînî ard ziwan ke rêxistinê selefîyan ke na raye de xebtinîne, eleqeya înan bi îslam çin a. Mele Muhîttînî nîya dewam kerd: “Rêxistinê ke cêncanê ma rusnenê herb, leweyê zaliman de cayê xo cênê. Nê kesî zalim ê. Eleqeya înan bi îslam çin a. Nê qisayî ke roşînê, wa cêncê kurdî tede memanê. Cayê înan hetê şarê xo der o. Ma gerek raver ra xo zulm ra raxelesnîme.”
Serekê CÎK Mele Muhîttînî waşt ke kurdî cêncanê xo rê wayîr vejîyê. “Verê, nê xortê ma heqê cematê xo, heqê keyeyê xo, heqê şarê xo saye bikerê. Seba naye mucadele bikerê. Muslumanîye naye îcab kena. Xora ê bi xo mazlum ê. Ma venga şima danîme: bêrê leweyê komelê xo. Rastîya îslamî na ya.”
