Baydemîr: Parlamentoyo otonom wazenîme

Serekê beledîyaya Dîyarbekirî Osman Baydemîrî (BDP)  nîya qisey kerd: “Eke waştişê nasname, kultur û zonê (ziwanê) xo gune yo, heya, ez gunekar a.” Baydemîrî waştiş ard zon (ziwan) ke mintiqayanê kurdan de parlamentoyêde otonom bêro ronayene.

Baydemîrî roportaj de ke bi (ebe) rojnameyêde fransiz kerdo, analîzê nîyanên kerd: “Ez 1995 ra bi nat avûkat a û no tarîx ra tepîya sucdarkerdiş û mehkûmîyetê mi yê muwekîlanê mi ra çar qatî zêde r’ ê. Merdim (mordem) şikîno vajo ke hunerê AKP seba çarnayîşê çîyan bi nimitkî zaf berz o. Serra 2006 de qanûn de vurnayîşî seba ke domanî wa bikuyê hepisxaneyan, amey vetene. Bi hezaran doman ke 12,13 ya kî 14serre bîy, mehkûm bîy, tayêne kî cezaya 30serrîye girewte. Kesî çîyê nêva. Labelê hîrê aşmeyan ra ver ke îqtîdarî ha eynî qanûn vurna, temsîlkarê YE kokê nê qanûnî kerdo xo vîr ra AKP pîroz kerd.”

Derheqê sucdarkerdişê terorîzmî de Baydemîrî va ke “Eke seveknayîşê heqanê merdiman (mordeman) û demokrasî gune yo, heya, o wext ez kî gunekar a. Eke waştişê kultur, nasname û zonê (ziwanê) xo gune yo, heya, ez gunekar a. Heta ke heqê ma yenê qebul kerdene, ma mucadele û na gunekarîya xo ra dewam kenîme. Ma zêde nêwazenîme. Ju (yew) Kurdîstano otonom ke zereyê Tirkîyayêda demokratîke de cayê xo cêno, wazenîme. Ma duştê parlamenteyê girsî yê Tirkîya de nîyîme, labelê ma rastê mintiqayan de kî ju (yew) parlamento wazenême. Ma duştê resmîbîyayîşê zonê (ziwanê) tirkî de nîyîme, labelê çarçewaya roniştişî de wazenîme ke kurdkî Kurdîstan de zono (ziwano) resmî bo. Seke Spanya de nimûneyê Katalonya de beno. No serewedaritişo 29. yê kurdan o. Heta ke rastîya ma yena qebul kerdene, ma dewam kenîme.”