Goreyê xebera keyepelê Zazakî.netî ra reya verên a ke Tirkîya de yew tezê lîsansê berzî bi kirmanckî (zazakî) yew unîversîte ra qebul bî.
Bi nameyê “Folklorê Kirmancan (Zazayan/Kirdan/Dimilîyan) Ser o Cigêrayîşê” tezê kirmanckî yê endama Grûba Xebate ya Vateyî û nuştoxe Nadîre Guntaş Aldatmaz hetê Unîversîteya Artuklu ya Mêrdînî ra qebul bî. Ame dayene zanayene ke sehaya tezê Dêrsim, Licê û Sêwreg a. Na reya verên a ke yew unîversîteya Tirkîya de yew tezo kirmanckî ame qebul kerdene.
Seba naye roja 14.01.2013 banê unîversîte de yew kombîyayîşê çapemenîye ame organîze kerdene. Tey mudirê Enstîtuya Ziwananê ke Tirkîya de Ciwîyenê ya Unîversîteya Artuklu Prof. Dr. Qedrî Yildirimî qiseykerdişê xo de va ke “Tarîxê Tirkîya de na reya verên a ke yew tezê zazakî qebul beno. Wayîra tezî mamosta Nadîre bi serkewtene mudafayê tezê xo kerd û mezun bîye.”
(…) Kêmanîya akademîsyenanê zazayan esta. Coka heta ke mumkin bo, wendekarê ma yê ke lîsansê xo yê berzî temam kenê, ma do enstîtuya xo de îstîxdam bikerîme. Enstîtuya ma manaya pêroyî de wayîrîya kurdkî, manaya xususî de zî wayîrîya zazakî û kurmanckî kena.”
Nadîre Guntaş Aldatmaz nuştox û endama Grûba Xebate ya Vateyî ya ke Anqara de manena. Seba ke beşdarê programê lîsansê berzî bo, a di serrî her peynîya hewteyî şîbî Mêrdîn. Derheqê tezê xo de Aldatmaz nîya va: “Tezê mi folklorê kirmancan ser o yo. La bi mintiqaya Dêrsim, Licê û Sêwregi sînorkerde yo. Ez folklorê nê mintiqayan ser o xebitîyaya. Mi xebata xo rasterast bi yewbînî dîyayîşê rî bi rî û seha de kerde. Seba ke mi nê warî de yew xebate kerda, ez zaf zerrîweş a.”
