Warê hunerî de bi kirmanckî gamêka newa bîne erzîyêna. “Tîyatroyê Bajarî” yê Beledîyaya Girde yê Diyarbekirî do bi kirmanckî (kirdkî/zazakî) tîyatro kay bikero.
“Tîyatroyê Bajarî” yê Beledîyaya Girde do Dîyarbekir de roja 29.10.2010 de saete 20.00 de Salona Tîyatroyî yê Beledîya Girde de eserê ke Azîz Nesînî bi nameyê “Sen Gara Degilsin” (Ti Gara Nîyî) nuşto, kay bikero.
Nê eserî Sabahattîn Gultekînî tirkî ra tadayo (açarnayo) kirmanckî (kirdkî/zazakî). Coşkun Doganî zî îdarekerdoxîye kerda. Coşkun Dogan kirmanc o û kirmancê Gimgimî yo. No kay bi hîrê kesan yeno kaykerdiş. Nê hîrê kesî zî kirmanc ê û kaykerdoxê Tîyatroyê Bajarî yê. Nê hîrê kesî verê ra yo ke kaykerdoxîya tîyatroyî kenê. Wina yeno fehmkerdiş ke hem îdarekerdox hem zî kaykerdoxê nê kayî warê tîyatroyî de xişîmî nîyê, cerebnayê.
No kay ziwanê kurdkî ra xerîb nîyo. Verê cû serra 2007î de bi lehçeya kurmanckî hetê “Tîyatro Avesta” ra amade bibi û festîvala TAKSAVî “Toplumsal Araştırmalar Kültür ve Sanat Vakfı” (Weqfa Huner û Kulturî yê Cigêrayîşê Komelkî) de kay kerdibi. La verê ke no kay Îstanbul de festîvala TAKSAVî de kay kero, Festîvala Huner û Kulturî yê Êlihî (Batmanî) de pêşkêşê şarê heskerdoxê tîyatroyî bibi.
Yew serre verê cû, yanî 29.12.2009 de, reya verêne bî ke televîzîyonê kurdkî yê KURD1 de bi nameyê “Homayan Aqil Pernayo” yew fîlm bi lehçeya kirmanckî kay kerdbi. Semedê ke kaykerdişê nê fîlmî reya verêne bî, kesê ke bi ziwan û hunerê kurdkî eleqeyê bi heyecanêko pîl no fîlm temaşe kerdibî.
Nika zî reya verên a ke yew kayê tîyatroyî do bi lehçeya kirmanckî kay bikero. Sey heme verênan, no kay zî seba ke verên o ez vana qey do reyna yew heyecan bido ê kesê ke bi ziwan, kultur û huner eleqedar ê.
Seke ma heme zî zanê, hunerê tîyatroyî mesajanê xo bi vatişan pêşkêşê însanan keno. O wext ma eşkenê vajê kaykerdoxê tîyatroyî ganî hem hetê hunerî ra, hem zî hetê qiseykerdişî de wayîrê qabîlîyetî bî. Hunerê tîyatroyî de huner çend muhîm o hende zî qiseykerdiş muhîm o. Ez hêvî kena ke kaykerdoxî do bieşkê bi kirmanckîyêka standarde qalî bikerî.
Reyna zî çi beno wa bibo ganî ma heme piştî (paştî) bidê nê kayî. Goreyê vatişan no kay do çar hewteyî her roja şeme saete 20.00 Salona Tîyatroyî yê Beledîyaya Girde de kay bikero.
Ez nika ra serkewtişêko pîl wazena nê kayê verênan rê.
Mehmud Nêşite
