Grevê vêşanîye yê da-700 hepsîyanê Tirkîya reseno peynîya hewteyê hewtinî. Ewro bîyo roja 50. ke hepsîyê kurdî vêşan ê.
Grevkerdoxan ke 12. êlule de bi dest bi grevê bêpeynî kerd, di çîyan wazenê: raverdayîşê serekê PKK Abdullah Ocalanî û resmîbîyayîşê ziwanê kurdkî, bitaybetî sîstemê perwerdeyî de. “Sazkerdişê şertanê weşîye, ewleyî û azadî yê Abdullah Ocalan, seveknayîş û qebulkerdişê heqê ziwanê dayîke.” Bîyê 50 rojî ke 714 hepsîyê kurdî ke yan sey endamê partîya îllegale PKK, ya partîya BDP yan kî sebebê dewaya KCK ra 64 hepisxaneyanê Tirkîya der ê, dest bi grevê vêşanîye kerd. Nîya weşîya înan verê tehlukeyê zerarê îrreverzîblî der a, demêde nêzdî de tayê do bikewê rewşa tehlukeyê vîndîkerdişê heyatî. Grevkerdoxî her formê werdî red kenê, la şenik awe, sole û şeker wenê.
Roja 38. de serekê pêroyî yê BDP Selahattîn Demîrtaşî qisey kerdîbî va ke “Eke nê însanî hepisxaneyan de canê xo danê, teber ra êdî kes pê nê şarî bi qalê ‘çîyê rindî benê’ bixapno.” Serekwezîrê Tirkîya Recep Tayyîp Erdoganî sermîyanê PKK sucdar kerdî: “Êyê ke bi xo kebab wenê, ferman danê ke hepsîyan bimirê.” Denîz Kaya ke nameyê hepsîyan de qisey keno, hukmatê AKP rê va, eke mudaxelêyêde qijkek hetê dewlete ra estbo, grevê vêşanîye do giranêr bo. “Ma çalakîya 700 kesan kenîme berz bi 10.000 kesî!”
Vizêr ra bi nat şaristananê Kurdîstanî de şar, komel û partîyan destek da grevkerdoxan, xeylê çalakîyî ca girewtî, tey bi hezaran kesî beşdar bîy. Tayê cayan de mabênê protestokerdoxan û hêzanê polîsî de pêrodayîşî vejîyay. Dîyarbekir de, bitaybetî verê hepisxane de, peynîya mîtîngê BDP de pêrodayîşê girsî qewimîyay. BDP û rêxisitinanê bînan veng dabî aksîyonê “cuye mevindarne”. Dîyarbekir, Şirnex û Wan de nê çalakîyan bi serfirazîye ca girewt. Dîyarbekir de heyat hema-hema vindert, Wan de zafêrîya karxaneyan û Colemêrg de pêro dikan û karxaneyan keyberê xo ranêkerd. Domanî kî nêrusîyay bi mekteban.
Nê çalakîyê protestoyî û vengdayîşî pêro Kurdîstanê Vakurî de vila bîy. 33 cayan de bi partîya BDP û Kongreya Komela Demokratîke kampanyayê piştîdayîşî virazîyê. Mesela Dîyarbekir, Colemêrg, Wan, Cîzîr, Êlih, Şirnex, Bismil, Sêrt, Melezgîrt, Çel, Mêrsîn, Kerboran, Qoser, Hênî, Nisêbîn, Ewêna, Hezex, Wêranşar, Şemrex, Pirsus, Sîlopî, Farqîn, Dêrik, Edene, Kop, Şemzînan, Bazid û Elbakî de milet kar nêşî û esnafî dikanê xo ranêkerdî.
Endama Partîya Sosyal-Demokrat a Karkeran a Swêdî û parlamentera Parlamentoyê Yewîya Ewropa Marîta Ulvskog mewzûyê grevê vêşanîye û rewşa heqanê merdiman a Tirkîya ard rojeva parlamentoyî.
Pisporê sîyasî vanê ke problemê mabênê tirk û kurdan yewna des serrî benê tenêna giran.
