Nê rojan rêyna of û puf kerdena Tayyip Erdoğanî ya. Çand serrîyo ke halê ma bi nê nîyaro. Hama ke kuno tenge ya tek -tekan moreno ya kî beno wara kara xo û nara erzeno. Yanê new serrîyo ke tek-tekan nîjneno, rijneno û pilêsîyo ra tek-tekan mendo. Tersa mina ke rojê kî binê tek-tekan de bipeleqîyo. Mordem ke rehet nêvinet qa cayê nê cayê ra kî qida êno. Raştî kî xo ver de nêvindeno. Ge kemere erzeno ûca, ge kemere erzeno naca. Roja ke ju de pêromedo, a roje çîn a. Sala vacê Xizir mordemî şaş nêkerone, şaş keno kî wa hardan ra kaş nêkerone.
Serekwezîr o ke roj-mirojî miletî de, muhalefet de, karkeran de, memuran de, dêzgê û komelanê sîvîlan de pêrodayîş de bone êndî a dewlete nê serekwezîr ê nîyanenî ra çi xêr vînena.
Xêrê dê kî hetê de, şima ke şîkînê xo rê nê ra hezbê xo bikerê! Hênî ke naleno hênî ke kaleno, nêzano ke se bikero. Serê qesa xo, binê qesa xo teror, teror, teror… Raştî kî qesey kerdena Erdoğanî ra mordem robe keno û pîsîrê xo kî têy şaneno ro. Ewro teror o ke Erdoğan ra bi hukumatê xo vay danê, yanê nê terorê AKP ra kes çîyê nêvano. Teror û terorîstî kî Erdoğan bi hukumatê xo ra yê. Tirkîye de milet nêtawreno ke çîye vaco. Hama polîs û jendermê Erdoğanî benê pîsîrê to ra, to erzenê zîndan. Êndî awa ke to zîndan de vînena, yew çar dêsê zîndanî zanê yew kî polîs û jendermê Erdoğanî zanê. Ê gelo no teror nîyo, ma çik o?
Nafa kî linge êşta parlamenteranê BDP ver.
Kar û gureyê xo cavirdo bîla parlamenteranê BDP kewto. Bi BDP herbê de psîkolojîk rameno. Namê BDP tewr nêceno fekê xo. Roj-mirojî heqeret re parlamenteranê BDP keno. Henî ke mordemê de mûr, hêni ke mordemê de gonerî yo. Yew partîya sîyasale re tehamul nêkeno. Wulle to biteqê nêteqê na sîyasal partîye helbet verba nêheqîyenîya şima de, verba zulm û zordarîya şima de, verba dek û dolabanê şima de çok ronênana, kar û gureyê xo de êna şona. Qey honde têy qarîna? Qey honde têy basîna? Qey honde têy teqena?
Xo ra CHP de kî maya xo ra bîyo nêbîyo ceng der o.
Wulle nê sere Baykalî werd. Ez bawerkena nafa kî dora Kılıçdaroğlu ya. Nînan kar û gûreye, meselêyê pêro cavirdê kêwte ra yewmînî. O bi serekê CHP Kemal Kılıçdaroğlu zê domananê qickekan danê pêro, vindenê.Yanê zê dîkanê Denizliye danê pêro û yewmîni purt kenê, toz û wele yewmînî ser o vay danê. Miletî kî xo re vineto nînan temaşe keno. O, êy ra qesa vano, o kî êy ra qesa vano. Coka meselêyê nênê çareser kerdene. Coka yew gamê ravêr nêşonê.
CHP karê xoyê muhalefetî nêkena, AKP kî karê xoyê îktîdarî nêkena. Coka ma ewro na hal derîme. Ne îktîdar îktidar o, ne kî muhalefet muhalefet o. Gorê nînan meseleya kurdan rewna hal bîya şîya. Yanê bi çand cayan de qursê ziwanî dayene, bi TRT-şeşî na mesela hal kerda şîya. Xo ra kar û gureyê nê hoppazan kî îmha û înkar kerdîş o. Zobîna çi karê nê hoppazan est o? Hela qatîye ci ke, karê nê hoppazan tawa xelesîno bawo. Hona vîzerî nê gonîweranan Roboskî de 35 însanê bêgunayî dayî kîştene. Hela nafa bi senê xeta û kotî çand sîvîlanê bînan kîşenê?
Wusênê Gestemerde
Gulane 2012
