Sînan Yerlîkaya kewt AKP

Wekîlo kan ê Dêrsimî Sînan Yerlîkaya û 20 dêrsimîjê bînî kewtî partîya AKP. Sînan Yerlîkaya raver ra CHP de wekîl bî.

Seba endambîyayîşê Sînan Yerlîkayayî, hetê AKP ra Anqara de yew kombîyayîş ame viraştene. No kombîyayîş de grûba AKP de rozeta AKP ya Sînan Yerlîkayayî hetê serekwezîrê Tirkîya Tayyîp Erdoganî ra ameye pira kerdene. Sînan Yerlîkayayî 29. çele de eşkera kerdîbîke CHP ra vîyareno AKP. Tayê serekê kanî yê beledîya û qezayan kî bi Yerlîkayayî ra pîya kewtî AKP.

Sînan Yerlîkaya derheqê qerarê xo de nîya qisey kerd: “CHP besenêkena ke polîtîka bivirazo. Dêrsim ra di wekîlê CHP estê. Kamer Genç çila girewta xo dest fetelîno. Huseyin Aygunî kî partîye kerd têmîyan ro. Herbê Xelesîyayîşî de pakkerdişo etnîk ame viraştene, vano. No fikrêde senîn o, ez besenêkena fehm bikerîne. Mi xeylê serrî CHP de mucadele kerd. Labelê bi CHP ra xizmetê şarî mumkîn nîyo. Seba şarê xo ez vîyart AKP.”

Leyê Sînan Yerlîkayayî de xeylê dêrsimijî AKP de û rojnameyê Zamanî de gureyenê.