Mintiqaya Hesekê (Hesîçe) ya Kurdîstanê Rojawanî de reya tewr verên a ke yew rafîneyê petrolî kewt fealîyet.
Goreyê ajansê xeberan ê fransizî AFP ra, xeznaya petrolî ya tewr hîraye ke Sûrîye de esta, Kurdîstanê Rojawanî, mintiqaya Rîmelan ê Derîkî der a. Yew teknîsyenê ke AFP de qisey kerd va ke rafîne kewt fealîyet û nika petrol vejeno. “Ma petrolî 125 dereceyan de kenîme germ û nîya benzîn virazenîme. 150 dereceyan ra beno kerosen, 350 dereceyan ra kî ma besekenîme feul oil virazîme.”
Silêman Xelef ke sey wezîrê petrolî yê kurdanê Rojawanî yo, berpirsîyarê enerjî yo. O vano ke “Reya verên a ke kurdî bi xo xoser petrol vejenê.” Verê cû, petrolo ke tîya ra vejîyabî, neql bîbî rafîneyanê girsan ê Sûrîye, bi Banyas û Humus. Labelê, Xelefî ra gore, cengê Sûrîye bî sebeb ke xeylê borîyî rastê hêrişan bîyê. Coka ewro petrol uca ra nêno. Feqet hamnanê parî de sermîyanîya kurdan dest bi karê petrolvetişî kerdbî. Sey netîce, 150 bîrê petrolî nika newe ra fealîyetî der ê, rafîneyî kî ameyî awan kerdene.
Verê ke Sûrîye de ceng rişîya, her roje 380 hezar varîlî petrolî amebîyî vetene. Çi esto ke ewro warê petrolî yê tewr dewlemendî destê rejîmê Sûrîye de ney, la destê DAÎŞ der ê. Ewro, Rîmelan de kurdî rojane 15 hezar varîlan vejenê. Ceng ra ver, uca ra 165 varîlî vejîyabîyî. Eke têverronîme, rejîmê Sûrîye ewro rojane tena 10 hezarî varîlan vejeno.
Xelefî ra gore, beno ke îstîqbal de kurdî besekenê petrol biroşê rejîmê Sûrîye kî. La hema şertê nîyanênî çin ê. Yew şert o wext beno ke kurdî kî para xo petrolê Sûrîye ra bicêrê. “Ma Hesekê destê DAÎŞ ra girewt sevekna. Petrolvetiş heqê ma yo”, Xelef vano, “Ma bi seyan şehîdî dayî!”
