Ferhat Tunçî rê bêrêzîya konsolosa Tirkîya

Serkonsolosa Tirkîya yê şaristanê Awusturya Bregenzî Nuray Înontepe badê ke heşna ke Ferhat Tunç beşdarê şewa elewîyan ke şaristanê Voralberg de ame viraştene, beno, qiseykerdişê xo sahne ser o red kerd.

No skandal şewa Merkezê Kulturî yê Elewîyan de qewimîya. Serkonsolosa Tirkîya Nuray Înontepe kî mêmana a şewe bîye û cayo verên de nişte ro. O taw de naskerdişê broşurî de aye dîye ke Ferhat Tunç kî jê (sey) deyîrbaz vejîno sahne ser. Naye ser o Înontepe venga sermîyanê komela elewîyan da û ey ra da zanayene ke “Salonê ke no merdim (mordem) tede r’ o, ez qısey nêkena.”

Sermîyanê komala elewîyan waşt ke qerarê aye bivurnê û aye ra va ke Ferhat Tunç hona salon de nîyo û peynîya programî de vejîno sahne. Konsolosa Tirkîya kî wedaritişê performansê Ferhat Tunçî waşt. Aye serekê komele ra va ke “No merdim (mordem) dişmenê dewleta ma yo, ju (yew) sebeb bivînê û ey program ra vejê.” No vate ser o sermîyanê komele şaş bî û aye ra vat ke beşdarê ke nika salon de cayê xo girewtê, seba Ferhat Tunçî amey. Naye ser o serkonsolosa şîye sahne û bi kilmekîye qisey kerd. Vero ke Ferhat Tunç vejîya sahne, konsolosa “Ez şona lawabo” vat û salon terk kerde şîye.

Ferhat Tunç kî tepîya 1,5 saetî sahne de mend û bi kilamanê xo yê bi kirmanckî, kurmanckî û tirkî salon xecelna. Seyrkerdoxan kilamê Ferhat Tunçî pîya vat û govend ant (ont).

Konser ra tepîya Ferhat Tunç va, “Ez no qeseyê serkonsolose ser o zaf şaş bîya. Ez besenêkena ke fam bikerîne însan çitur kesa nîya faşîşte silayîye keno ano na şewe. Nînan Tirkîya de xeylê serrî her çîyê ma kerd qedexe, nika kî wazenê ke naye Ewropa de dewam bikerê. Ê wazenê ke veyvenda elewîyan de hunermendê elewîyan qedexe bikerê, ez no tewro faşîşt şermezar kena.”