Rojnamegerê ajansê DIHA û fotografkêş Ferhat Arslanî ekspozîsyonê xoyo dîyin bi nameyê “Sereyê Sûrî – Qizilbaş” Dêrsim de kerd ra. Bi no gurayîşê fotografan Arslan wazeno ke ju (yew) mesajê “Xoverdayîşê duştê asîmîlasyonî de” bido.
Rojnemeger Arslanî karê xo yê fotografkêşîye bi “Rengê Mezepotamya” dest kerdîbî ci. Na rey objektîfê kameraya xo çarna elewîyanê Dêrsimî ser û naye ra tepîya wazeno ke “Remayîşê Agirî” bivirazo.
No ekspozîsyonê fotografan reya verêne Dêrsim Mamekîye de salonê beledîya de yeno rakerdene. Ju (yew) hewte ra tepîya nê fotografî Îstanbul, Dîyarbekir û Munîh de yenê verê çimanê qayîtkerdoxan.
Sebebê viraştişê ekspozîsyonî kurdanê elewî yê Dêrsimî ser o Arslan nîya vano: “Sereyê Sûrî cografyaya Mezepotamya de formêde verên ê îtîqadî yê û ê kalikê kurdan e. Duştê pêro qetlîam, xeribîye û asîmîlasyon de înan besekerd ke no îtîqadê 10.000 serran bîyarê bi ewro.” Vatişê Arslanî ra gore mîyanê îtîqadê Dêrsimî de tebîet esto. Naye de tewir muhîm çemê Mizurî û çimeyê ey ê ke nika game bi game hetê awbendan ra yene xirabin kerdene. Arslan nîya dewam keno:”Verba zilm û bêbextîye de şarê Sereyê Sûrî her koyo ke serê xo de xo xelesnayo, kerdo ju (yew) zîyare (jîyare). Adir bimbarek o, no rî ra her zîyare de adir yeno wekerdene û nîyaz vila beno. Çi heyf o ke Mezepotamya domanê xo kena vîndî. No formê îtîqadî bi asîmîlasyon ra beno vîndî.”
Mordem sas beno ke no itiqate 10.000 ren niya bî awbendu, bî komelune elewiye tirkî, bî asimilasyon giran giran beno vind. 10.000 serre ra hata nika dae nibi, labele na 30 serre de ma besenikeme ke itiqate kalikune xo bixelesnime. Make ziwane xo raxelesnime, itiqate mak xelesino. Be jiyaru, be kirmanckî itiqate ma beno vind.