Goreyê merkezê çapemenî yê YPG, operasyonê artêşa Tirkîya ke tirba Şah Silêmanî texlîya bibo yewna ca, bi hetkarî û koordînasyonê YPG ame kerdene. Şah Silêman kalikê Osman I. bî, awankerdoxê Împaratorîya Osmanîyan. Tirba ey Sûrîye de mendbîye.

“Operasyon bi zanayîşê Fermandarîya YPG û beşdarîya hêzanê Kobanê virazîya”

Vilaweka YPG de yeno vatene ke “no operasyon bi zanayîşê Fermandarîya YPG û beşdarîya hêzanê ma yê Kobanê ame viraştene.” YPG ra gore operasyon çar rojî verê cû bi beşdarîya selahîyetdaranê Tirkîya ame plan kerdene. “No çarçewa de vizêr [21.02.2015] şan saeta 21:00 de artêşa tirke bi wasîta û hûmara bellî ya eskeran keyberê Murşîtpinarî ra kewtî zereyê sînoranê kantonê Kobanê. Artêşa tirke serê rayanê ke raver ra ameyî bellî kerdene, uca binê rastkerdişê wasîtayanê ma reşte tirba Şah Silêmanî.”

Seba ke artêşa tike bireso tirbe, korîdorê 5 km hetê cengdaran ra amebî rakerdene. Dorê 300 cengdaranê YPG beşdarê operasyonî bîyî. Bi desan tank û dorê 500 leşkerê tirkî kî sînor vîyartî. Cayê tirbe, herçiqas ke Sûrîye der o, goreyê yew peymana 1921 parçeyê dewlete Tirkîya yo. Dorê 40 leşkeranê tirkan tirbe seveknayêne. Cayê tirbe binê tehlukeyê çinkerdişî hetê terorîstanê “Dewleta Îslamî” (DÎ) de bî, coka ame berdene cayêna. Tirba kane ame rijnayene, cayo newe nika dewa Eşme, nêzdîyê Kobanê der o.

“Uca erdê şarê Kurdîstanî yo.”

Çi esto ke hetê hukmatê Tirkîya ra hema vilaweka resmîye çin a ke na hemkarîye tesdîq bikero. Serekwezîr Ahmed Davutogluyî tena va ke artêşe bi grûbanê “zereyê Sûrîye de, tede kî Artêşa Azad a Sûrîye de pîya” gureya ke sîvîlî nêmirê. Qalê YPG nêbî.

Endamê Komîteya Îdarekerdişê PKK, Murat Karayilanî, no derheq de da zanayene ke operasyon “temamê xo de qisey bî, munaqeşe bî û planêde muşterek ra gore ame viraştene”. Karayilanî ra gore dewleta Tirkîya hetta destûrê DÎ girewto ke şêro nêzdîyê mevkîyanê aye. Îddîayanê Davutogluyî ser o ke Tirkîya kesî ra destûr û destek nêgirewt, Karayilanî nîya va: “Eslê xo de, eke qalê kurdan beno, dewleta tirke û hukmatê AKP tim nîya kenê. Yanî, uca yew îrade esto, kantonê Kobanê esto. Ti merkezê şaristanê Kobanê ra vîyart, 33 km raye şîya, hêzanê asayîşî kî ti rast kerda, raye kerde ra, hetkarî pêşkêş kerd. Tewr tay însan sipas keno.” Ser o kî, Davutogluyî çapemenîya tirke de da zanayene ke nika “se metreyî boverê sînorê Tirkîya de nika erdê aye yo newe virazîya.” Karayilanî cewabê ney nîya da: “Uca parçeyê erdê şarê Kurdîstanî yo. Dewa Eşme parçeyê kantonê Kobanê yo.”

Melumatan ra gore kî serekê şaredarîya Kobanê Enwar Muslîm şî Anqara ke bi temsîlkaranê dewleta Tirkîya bêro têlewe. Heto bîn ra, hukmatê Sûrîye operasyon sey hêriş hesibna û şermezar kerd. “Tirkîya dest dana çeteyanê sey DÎ, El-Nusra û grûbanê bînan sey El-Qaîde. Nika kî hêrişê erdê Sûrîye kena”, vilaweka resmî ya Sûrîye de ame dayene zanayene.

1 ŞÎROVE

  1. Hani sima vatene YPG PYD PKK IŞİD zu yo. Hem piya kar kene hem inkar kene. Xizir aqil do sima.! Se vaci..

CEWAB BIDE

Keremê xo ra şîroveyê xo binuse
Keremê xo ra nameyê xo binuse