Yeno mi vîr. Yew fîlm de kêneke lajekî ra pers kerdêne: “Ti mi ra çiqas hes kenî?” Lajekî vat: “Hende nan, hende zeytunan.” Wa bêr vîrê to zî. No heskerdiş o!

Wendekarê mi bo, name nika lazim niyo. Yew roje sinife de şîîra Ahmed Arifî wende: Mi Hesrete To Ver Qeydûbendî Kerdî Kehan. Tenefus de ame ver mi û va “Emşo no kitab mi de vindo.” Mi fehm kerd. Ez ê wextan de Duzagaç ra heta sûke pay amêne. We zî ame yew roje. Pird de dest pêkerd vatişê waştîyê xo. Çimanê yi bî pirrê hesîran. Mi ew teqûreq de bawer kerd holîye ra, rindîye ra. Wexto ke waştîyê xo vano, ew wext bermeno, yew merdim. Sey deyîrê Muslum Gursesî yo. No heskerdiş o!

Ez kewto lîse. Pî mi vernî de, ez yi dima. Ma şî Çewlîg. Yew banê tarî. Na rey ez hinî tena wa, mi zana. Yew şaneyê mi bibo, yew şaneyo zergûn. Mi gijik xo kîşt ser dane. Mi hema cixara zi nîşimite. Kuçeyî teng, estarî dûrî, tenayî nêzdî bî. Ez tersêne, çakêt mi rê gird amêne, mi vat de her kes mi huyeno. Ez nêmusêne tîya, ez nêeşkêne. Di hewteyan ra pey ez şîya dewe. Yew deyîrê Kizilirmakî esta, deyîrê Abdulselamî, hîkayeyê Abdulselamî vana. Ez şîya Studyo Ozlem û mi no bant girewt. Ti vana qey ez bextîyar a. Mi xo qefelna yew oda û in bant goşdarî ke. Mi nêwaştêne kes mi vîn. Yew ce na deyîre de wayê mi pera virard ke mi ra. Mi ew wext zana Hesen û Husen, mi ew wext zana wayê înan Zeyneb. No heskerdiş o!

Yew şilîye, yew şilîyê gird. Ez hinî pê çekuyanê to ya qalî kena. Ti vana qey ez qersîyaya û mi yew xirqeyo zergûn girewt xo ra, ti vana qey milpêşeyê mi zî esta. Ti vana qey pîyê mi destê mi tepîşt û mi ra meselanê Hezretî Elî vano. Wexto ke pîyî mi vano şodir beno, tarî şino. No heskerdiş o!

Aşmê êlûle. Televîzyon de yew xebere. Vano ke yew xezale kişîyaye. Vano ke koyan bêveng, çeman bêaw. Vano ke embazê Ugurî ya. Ez vano embazê Meryemî ya zî, embazê Berkînî. Televîzyonan de yew fotograf, yew fotografê qijkek. Vano ke Ceylan kişîyaya dewê Licê de. Embazê Ugurî. Welat kamca nika, welatê dayîka min kamca? Rîyê erdan wayîrê daran, Homa wayîrê rîyê erdan, ez kam o? No çik o!

PARE BIKE
Hesen Polat
Hesen Polat serra 1988 de Çewlîg de ameyo dinya. Anqara de edebîyat wend.

1 ŞÎROVE

  1. Silam;

    Hesenê bira, ez hem li ser navê te hem jî li ser navê dersiminfoyê zaf şa bûm ku te li vir dest bi nivîsandinê kiriye. Min kêfxweşî nivîsa te ya jidil xwend. Wekî kesekî nas yê qelbê te yê tenik, ez ê li vir, li vê keyepelê li benda nivîsên te bim Hesen-can.

    Ev keyepela wê bo hezkiriyên te bibe navendek. Xêra xwe me ji nivîsên xwe bêpar nehêle!

    Ez, wekî dostekî te, li benda kelama te me!

    Weşî di bimane!

CEWAB BIDE

Please enter your comment!
Please enter your name here