Meclîsê Parlamenteran ê Konseya Ewropa (PACE) venga endamanê xo da ke seba newe ra awankerdişê Kobanê destek bidê.
Roja çarşemîye parlamentoyê Yewîya Ewropa (YE) kombîyayîşêk viraşt û seba pêşnîyaza newe ra awankerdişê Kobanê ray da. Raporo ke ame dayene parlementaranê YE, tede derheqê Kobanê de madeyê bi sernuşteyê “Zeraro însanî yê aksîyonanê grûba terorîste DÎÎŞ (DAÎŞ)” esto. Ney ra gore destek bidîyo Kobanê ke hemwelatîyê şaristanî besebikerê racêrê. Qeraro ke ame rusnayene Konseya Wezîran û parlamentaranê welatan, tede 47 welatê PACE rê veng dîya ke seba awankerdiş piştgirî peyda bo.
Rapor hetê wezîra kan a Fransa Jean-Marîe Bockel ra ame amade kerdene. Kombîyayîşê 3 saetan ra dime rapor bi pêro rayan qebul bî. Rapor ra gore kerdişê rêxistinanê sey “Dewleta Îslamî” (DÎ) sucê cengî û sucê duştê merdimî yê. Coka lazim o ke Dadgeha Ceza ya Mîyanneteweyî (ICC) nê warî de hereket bikero.
Goreyê raporê peyênî yê UNHCR, 4 mîlyon kesan Sûrîye terk kerde, 7 û nêm mîlyonan kî zereyê welatî de koç kerdî. 2014 de 75.000 kesî merdî. Bi vatena PACE, rewşa Sûrîye “fecî” ya. Bockel giranî da ser ke ganî rêxistinê sîvîlî ke Sûrîye de fealîyet der ê, ganî înan rê ardim bireso.
HDP ra Nazmî Gurî nameyê Grûba Çepgiran ê PACE de qisey kerd va ke DÎ û çeteyanê bînan Şengal û Rojawan de sucê giranî kerdî, ser o kî ardim nêreseno multecîyanê ke Tirkîya û welatanê bînan der ê. Gurî ra gore ganî desinde ardim bêro rusnayene Kobanê ke şaristan newe ra awan bibo. “Duştê lojîstîkê xirabî de şarê kurdî musna û hîna musneno ke senî xo ver ro dano. Xoverrodayîşê kurdan o ke raverşîyayîşê DÎ Kobanê û Şengal de vinderna. Coka ked û lebata înan hetê YE ra tesdîq bê ke bitaybetî Kobanê newe ra awan bibo.”
eke Rojava xoser bîynî problemê ma zî hel bîynî. ganî Başûr piştgirîya Rojava biko, wa kurdî xoser û cesur û azad bê. la winî aseno ke derdê sîyasetmedaranê ma çîyêna yo, yobînî rexnekerdişî û cêbanê xo pirrkerdiş ra teber çîyêkî nêzanî