Xoverdayîşê Xortanê Parkê Gezî

Sere de xoverdayîşê xortanê Taksîmî bi rûmet selam kena û na mucadeleya înan de înan rê serkewtene wazena.

Bi rojan o ke meydanê Taksîmî de, yanî Parkê Gezî (Gezi Parkı) de xoverdayîşê xortan bi serkewtenêda hewle berdewam keno. Verba nê xoverdayîşê xortan de kî polîsê dîktatorê zulmkarî bi top û tankanê xo miletî ser o zulm û zordarîye vay danê. Verba nê zulm de kî ka her hal de kes dest û pay girêdaye û cayê xo de bêveng nêvindeno. Ewro êndî nêxoverdayîşê Parkê Gezî/meydanê Taksîmî de her partîye ra, her sendîka ra, her dezgeh û komele ra, yanî her milet ra kurd-tirkî cayê xo gureto. Verba zulmê AKP de vengê xo, qewetê xo kerdo juyê û na esna de dersêda rinde û lapaçêda hewle kîşte ra binê goşanê Erdoganî û hukmatê ey ra.

Nika gelê way û birayan, nêheqîya zaf û şenike çin a. Nêheqîye hertim nêheqî ya. Nika Parkê Gezî de çar-ponc darî birnayene kî nêheqî ya, welatê ma, dewê ma, birrê ma, koyê ma, zîyar û dîyarê ma talan kerdene û veşnayene kî nêheqî ya. Raştî kî qet kesî qasê şarê ma zulm û zordarîye nêdîye. Heya raşt a, verba nê zulm de kî rojê kesî ra veng nêvejîya. Ma her kes rê, her miletî rê heq, huqûq û edalet wazeme, la çi heyf ke her kes kî zê ma nêfikirîno. Muhîmîye a wa ke kotî û kam rê nêheqîyênî ameye kerdene, mordem kî verba nêheqîye de vengê xo, qeweta xo ju kerone û doş bido doşî verba zulm de pîya lingan ser vindero.

Qet bêguman bi serran o ke hukmê hukmatê AKP miletê fuqarî ser o berdewam keno. Xora dîktator Erdogan kî serxoşê nê serran o. Serre bi serre xo guret ra, serre bi serre ca da xo û hetanî ke Tirkîya talan û weran kerde. Miletî kî nîyada ke êndî no zulm nêno antene bi vengêde berz va êndî ey şima bes o û naye ser o kî dest bi nê xoverdayîşê hewlî kerd.

Ewro kî êndî no vengê xoverdayîşê xortanê Parkê Gezî hercayê Tirkîya û her cayê cîhanî ra bîyo vila. Eke ca bi ca ra bî vila, maskeyê rîyê diktatorê zulmkarî kî gonîwer o û hama henî mîyan de bî sûr û mor mend. Kam xo ra se vano wa vaco, la dîktator bi hukmatê xo ra çiqas ke helana bido xo kî xoverdayîşê xortan ra tewz û tersêde rind guret.

Mordem ke hama qayîtê na rojeva rojanê Tirkîyaya pêyene kerd, rind zano ke dîktator û hukmatê xo ra pîya gore keyfê xo meydan de cîrît erzenê. Vanê, ma nîya keme, ha keme, nîya virazeme, nîya rijneme, yanî hukm û zulm ma dest der o, kes nêşikîno ma ra çîyê vaco.

E, de gelê way û birayan, şima vanê Taksîm ma rê çi! Qayîtê ci bêne ke weqetê nînan juyê nîya, di nîyê, hîre nîyê, weqetê nînan zaf ê, zaf. Vaştê ra bi zanitene qayîtê rîyê elewîyan/qizilbaşan kerde û nameyê qetilkarê elewîyan. yanî nameyê Yavuz Sultan Selîmî nayêne pird ra. Ka no gonîwer gonîya elewîyan bi kulman birone mird nêbeno, nêbeno. Henî ke dişmenê şarê elewî yo. E de bê vace Taksîm mi rê çi, e de bê vace nameyê pirdî mi rê çi, e de bê vace…

E ma ez, se vacî Taksîm mi rê çi? Ez kî vana gelê azeban, gelê xortan, gelê way û birayan, xover bidê! Vengê xo berz, qewetê xo ju kerê ke wa textê dîktatorê zulmkarî kî rew birijîyo. Birijîyo ke wa bizano ke dinya çand koşî ya.

Mi ra gore dîktator bi hukmatê xo ra verba xoverdayîşê xortanê Taksîmî de kerd vîndî. Xortan dersêda rinde û tersêde hewl da bi hukmatê AKP. Hukmatê AKP kî êndî goreyê keyfê xo henî rehet-rehet cîrît kay nêkena.