16. teşrîne verêne de, Kerkûk û çend mintiqayê bînî yê Kurdîstanê Başûrî kewtbî destê dagîrkeranê Kurdîstanî, artêşa Îraqî û çeteyê Heşd al-Sabî. Vizêr û bitaybetî ewro peşewe çapemenîya kurdan de derheqê hereketê peysergirewtişê erdê Kurdîstanî de xeylê rîwayetî bîyî vila. Seba ke her çî hîna teze bî û seba ke xeylê rîwayetî û xeberî estbîyî, ma ceribna ke pêro melumat arê bidîme û tesdîq bikerîme. Peynîye de henî asa ke çapemenîya kurdan pêbawer nêbîya û coka hereketê xoverodayîşî seranser çin bî. Cêr ra pêro xeber û rîwayetê muhîmî yê na mesele yê ke arê dîyayê, rêz benê. Eke tesdîq nêbîyî, cumleyî xêzkerde yê.


18.10.2017:

  • Înternet ser o vîdeoyêk sey adirî bîyo vila: Kerkûk de xortêde kurd erzîno wesayîtê polîsê Îraqî ser û alaya Îraqî ano war. O xort bîyo sembolê xoverdayîşê şarê kurdî. Goreyê xeberan ra xortê anonîmî va “Mi xo ra va, ya ez na ala ana war ya kî mirena. Çike ma bindestî qebul nêkenîme. Kurdê ke mirenê, wa seba ala û welatê xo bimirê.”

  • Şarê Kurdîstanê Başûrî xeylê cayan de dest bi protestoyan keno ke xo ver o bidê. Kurdî îşgalê artêşa Îraqî û çeteyan qebul nêkenê.
  • Serekwezîrê Îraqî Haydar al-Abadî dano zanayene ke artêşa Îraqî û Heşd al-Sabî, xeyrca Meydanê K1 û waranê petrolî, xo Kerkûk ra peyser bianco. Vanê ke serekê şaredarî yê newe yê YNK ra bibo

19.10.2017:

  • Pêro şewe şarê Kerkûkî protesto keno û xo dano ver o. Vîdeoyî benê vila ke Silêmanî de ajanê Îranî kuçeyan ser o yenê teber eştene.
  • Fermandarîya Pêşmergeyan îşgalkerdoxan rê ultîmatom dano: heta saeta 04:00 şaristanî biteriknê ya kî ma hêriş kenîme.
  • Xaneqîn û Gulale ra çeteyî yenê eştene. Şar bi xo çeteyan de dano pêro.
  • Pêşmergeyê PDK-Î ver bi Kerkûk hereket kenê.
  • Meydaya PDK ra gore teyarayanê cengî hêrişê mevkîyanê Heşd al-Sabî kerd. Eke no melumat rast o, hîna tesdîq nêbîyo.
  • Şodirê panşeme de bi hezaran pêşmergeyî ameyî rusnayene derûdorê Kerkûk.
  • Raporan ra gore DAÎŞ di dewê nêzdîyê Kerkûkî de îşgal kerd
  • Çeteyê Heşd al-Sabî Şengal ra vejînê.
  • Ajansê Rûdawî ra gore, taxê Kerkûkî Rehîmawa, Penca Elî û Şorice hetê pêşmergeyan ra kontrol benê.
  • Kerkûk de mevkîyê leşkerî yê Çîmenî ser hêriş esto.
  • Goreyê êzîdîyanê Şengalî ra Şengal bi xo binê hukmê êzîdîyan der o, ne pêşmergeyî ne kî çeteyî tede estê.
  • CNN ra gore çeteyanê Heşd al-Sabî heta ewro Kerkûk de 5.000 ban û dikanê kurdan talan kerdî. Melumato verên ra gore roja dişemîye ra nat 100.000 kerkûkijî şaristan ra remayî
  • Goreyê spîkerê Wezaretê Pêşmergeyan Helgûrd Hîkmetî yo ke kanalê televîyzonî K24 de qisey kerd, va ke halê Kerkûkî hema îstîsnayî yo û pêşmergeyî çi ke destebera yenê, do bikerê.
  • Xebera BasNewsî ra gore fermandarê pêşmergeyanê Şengalî Qasim Şeşoyî va ke Şengal de qet çeteyî nêmendî, tena tayê çekdarê êzîdî mendê.
  • Mehkemeyêda Îraqî ferman da ke Sereko Hetkar yê Herêmê Kurdîstanî Kosret Resûl bêro tewqîf kerdene.
  • BasNews ra gore spîkerê PDK yê Kerkûk û Germîyanî, Ednan Kerkûkî, va ke xeberê ke vanê Heşd al-Sabî xo Kerkûk ra peyser ant, ê zur ê, hîna xeylê çeteyî zereyê şaristanî der ê.
  • Ajansê Kurdîstan24 xebere weşanaya ke Kerkûk, Xaneqîn û Şengalî hîna binê hukmê dagîrkeran der ê. Naye ra gore artêşa Îraqî tena semedê emrê Abadî ra xo zereyê şaristanan ra ant, la polîsê Îraqî hîna her çî kontrol keno. Tayê cayan de şar û bitaybetî xortan sereyê xo darit we, la henî aseno ke xoverodayîşo pêroyî çin o. Va, “Heyder Abadî qerar dayo, tena polîso federal û dezgehê ewlehîye eyaletê Kerkûkî de bimanê. La rastîye de Kerkûk, Xaneqîn, Şengal û xeylê mintiqayê Kurdîstanî yê bînî binê destanê qilêrinan yê nê hêzanê dagîrkeran der ê û qet xo Başûrê Kurdîstanî ra kî peyser nêanto.”
  • Parlamenterê YNK yê parlamentoyê Îraqî Rêbwar Tahayî da zanayene ke tena nêmeyê çeteyanê Heşd el-Sabî Kerkûk ra vejîyayî, rojanê ameyoxan de kî pêro çeteyî vejînê, o ra dime polîsê Îraqî yo federal wezîfeyê asayîşê şaristanî gêno. Tahayî ra gore polîsan ra qederî qet hêzêde bîn Kerkûk de nêmano.

CEWAB BIDE

Keremê xo ra şîroveyê xo binuse
Keremê xo ra nameyê xo binuse