Rejîsoro kırmanc Caner Cenerîk, fîlmê xoyo newe “Bertij” qedêna. Mewzûyê fîlmî heyatê domananê wareyî yo. No fîlmê dokumenterî 1 seate 46 deqayî rameno û Pilemurîye de, Koyê Helî de, çar aşme de ame çarnayene.
Caner Canerîk bi no fîlm ra wazeno ke halo giran ê şarê wareyan bimusno ra qayîtkerdoxan. Ziwanê (zonê) nê dokumenterî bi (eve) tirkî û kirmanckî ya. Fîlm de nameyê domanan bi kirmanckî yê, labelê (hama) ê domonî bese nêkenê ke bi ziwanê xo qisey bikerê. Kaykerdoxê fîlmî nê yê: Dilane (6 aşmî), Rozerîn di serre der a û Rojbêne şeş aşme der a.
Caner Cenerîk seba no fîlm nîya vano: “Dêrsim de 1938 de yew (jû) tereleyo giran ame viraştene. Bi des hezaran kesî amey qir kerdene. Êyê bînî kî rusnaybîy surgun. Des serran tepîya şarê Dêrsimî onca cêra (gêra) şî welatê xo. Serranê 1970an û darbeya 1980î de şarê Dêrsimî dejê giranî dîy. Tayê onca Dêrsim terk kerd şîy. Serranê 1990an de dewanê Dêrsimî û sûkanê kirmancanê bînan veşnayî, cêncî amey vîndî kerdene. Sebebê meselanê nîyanên ra ma zereyê ma de her wext dejî bîy, omidê ma bî vîndî. Hêvîya mina newîye ez domananê bertijan de dîye, mi coka no fîlm ant.”
