Keyepel Nuştoxî ra Willayî ke şarê ma kî dîye hesîrîye – Wusênê Gestemerde

Willayî ke şarê ma kî dîye hesîrîye – Wusênê Gestemerde

136
0

Ez sere de qetlîyamê Maraşî şermezar kena û aj û amêne dişmenî rê nalet wanena. Bitaybetî şehîdanê Maraşî ver de kî vilê xo kena çewt û bi rûmet yad kena.

Heya bawo, heya, şarê ma çi dî, çi nêdî. Ju Heq zano, ju kî şarê mano kirmanc zano. Serê hardanê na dinya ra ez bawer nêkena ke kesî qasê şarê manê kirmancî sefalet ant. Kesî qasê şarê manê kirmancî feqîrîye û hesîrîye nêdîye. Kesî qasê şarê manê kirmancî belengazîye û bêkesîye nêdîye. Kesî qasê şarê manê kirmancî zulm û zordarîye nêdîye. Kamî ke destê xo kerd berz virêndîye da werteyê çimanê ma ro. Kamî ke destê xo kerd berz virêndîye da qizilbaşanê kurdan ra. Raştî ya kî qizilbaşanê kurdan hem hetê bawerîya xo ra hem kî hetê ziwan û kulturê xo ra zulmkaran dest xeylê anto.

Zalim û zulmkaran nêverda ke ma çimanê xo yakerîme. Nêverda ke ma vacîme dayê. Nêverda ke ma vacîme bawo. Nêverda ke ma bi rehetîye letikê nanî biwerîme. Nê erda ke ma bi ziwan û kulturê xo biciwîme. Şarê ma rê dînya kerde zîndan, bawo.

Heya bawo, heya, a ke şarê ma dîye, şarê ma dîye. Vace wa Xizir mîyarone kemer û dare ser. Çand rey adirê zulmkaran de veşayî? Çand rey qatlîamî bîy? Çand Kerbelayî dîy? Qizilbaşê kurdî çand rey Kerbela de veşayî. Qetlîyamê Dêrsim, Sêwasî, Mereş, Gazî, Çorumî… seba ma yew Kerbela bîye. Nê zulmê dişmenî ver oncîya kî şarê ma kesî ver de sere ronêna. Oncîya kî kesî ver de ê nêamey çokan. Înan Xizirê Kalî ra dot kesî ra minete nêkerde.

Şarê manê bindestî her het ra ont. Hona-hona kî oncenê. Demê Osî ra bicê hetanî demê tornanê Osî yanî hetanî demê Erdoganî.

Willayî ke bawo dişmenê şarê ma kî destanê xo hine kenê… her weqeta Kerbela ra dime nînan bi keyf û eşq destê xo hine kerdêne. Ma nê weqetanê dişmenî se xo vîr ra keme? Aya ke înan arde şarê manê feqîrî ser, qet ma vîr ra şona?

Wa ê nîya zulm û zordarîye bikerê, wa ê nîya xo tadêne, heqa miletê bindestî roje nê roje pirnikanê zaliman ra fîtîl-fîtîl yena.

Bi na wesîle, ez kî sere de serra şarê mano ke her çar parçeyanê dinya ra bîyo vila, miletê mano ke zulm rê ci ameyo kerdene, kedkaranê DêrsimÎnfoyî rê, nuştoxê manê ke DêrsimÎnfo de nuşteyanê xo nusenê û bitaybetî kî kedkaranê ke zere û can ra ziwan û kulturê ma ser o xebetîne, pêroyîne rê serkewtene, canweşîye û wa serra 2011 de ma pêroyîne rê xeyr bêrone.!

Serra şimana 2011 fîraz û bimbarek bo!

Wusênê Gestemerde

PARE BIKE
Wusênê Gestemerde
Wusênê Gestemerde serra 1971 de dewa Gimgimî Gestemerde de ameyo rîyê dinya. Serra 1990 ra nat Ewropa der o. Endamê Înstîtutê Ziwan û Kulturê Kirmancî (Zaza) ÎKK e.V. Berlînî yo. Serra 2000 ra nat ziwan û kulturê xo ser o xebitîno û bi kirmanckî (zazakî) meqale, hîkaye û şîîran nuseno. Serra 2012 de Wusênî Xelata Edebîyatî ya Huseyîn Çelebî girewte.