Keyepel Nuştoxî ra Alî Beytaş Wijdan – Alî Beytaş

Wijdan – Alî Beytaş

325
1

“Bombayê qetilan domananê zerrîya purra pakan ser o sey şilîye varenê. Vizêr Sey Rizayî ser o varayêne, Şêx Seydî ser o varayêne, ewro kî koyanê Kurdistanî de domananê zerrîya purra pakan ser o varenê. Kam çi zano, qetilî hona çi anê ma mazluman ser de. Heqo eman!”

* * *

Wijdanê tayê însanan esto. Duştê qetilan de zereyê xo her roje dejeno. Çimê xo îstirin ê her dem, sey yew domano qijkek. Zerrîtenik ê, bermonik ê, vileçewt ê. Çimke wayîrê wijdanî yê. La qetilî hertim bêwijdan ê.

Wijdanê tayê însanan esto. Duştê zulmkaran de bêveng nêvindenê. Ge zîndanan der ê ge qelema xo şuxulnenê. Çimke wayîrê wîjdanî yê. La zulmkarî hertim bêwijdan ê.

Wijdanê tayê însanan esto. Zanê ke wijdan namûs o, wijdan dilopa çiman a. Coka merdimê binamûsî hertim rind ê, hertim hetê mazluman der ê. Çimke wayîrê wijdanî yê. La  bênamûsî  hertim bêwijdan ê.

Wijdanê tayê însanan esto. Duştê bêedaletîya faşîstan de serewedaritox ê. Îsyankar ê. Çimke wayîrê wijdanî yê. La faşîstî hertim bêwijdan ê.

Wijdanê tayê însanan esto. Neheqîye nêwazenê. Hetê rinde û raşte der ê. Zereyê înan sey zereyê suravêlikê tenik o. Qelbê xo pirteno şew û roj, sey tikayîşê seatê, sey vengê zereyê çuçikê. Duştê merdena yew çuçike de kî berbenê. Çimke wayîrê wijdanî yê. La bêmerhametî hertim bêwijdan ê.

Wijdanê tayê însanan esto. Duştê zulman de zereyê xo her roje nêweş o. Vileçewt ê seba sewda û eşqê zereyê xo. Çimê xo bermenê çar mewsîmî. Dest û payê xo lerzenê şan û şodir. Çimke wayîrê wijdanî yê. La xedarî hertim bêwijdan ê.

Wîjdanê tayê însanan esto. Duştê zulmkaran de şêrê zereyê xo hertim lingan ser o yo. Çimeyê roştî yê. Duştê tarî de çimê xo bereqînê sey rojê hamnanî. Roşnvîrê welatî yê. Duştê xirabe de wayîrê wijdanî yê. La xirabinî hertim bêwijdan ê.

Wijdanê tayê însanan esto. Duştê dîktatoran de bêhêvî nîyê, la bêçare yê. Duştê zulman û bêwijdanîye de tik û teyna r’ ê sey murîya çolî. Permelînê û bermenê. Bêdestpay manenê. Çareserîya dawa xo wisarêde bîn ser o verdanê û şonê. Çimke wisar mewsîmêde bisebeb bo. Çimke wisar mewsîmê çareserîya derd û kulanê bêkesan û bêkêsan o. Çimke wisar hêvîya wijdanî ya.

Sereyê xo cênê û şonê. Bermayîşê xo cênê û şonê. Wijdanê xo cênê û şonê. Têdê neheq û bênamûsan bavokê Heqî kenê. “Bimano dewaya ma, Olî Dîwanî rê bimano”, vanê û teknenê şonê. Şonê, la şî kotî wijdanê xo kî tey benê.

Feqet duştê neheq û bênamûsan de welat bêwijdan nêbeno. Çimke wijdan o yo. Wijdan ez o. Wijdan ti ya. Wijdan welatperwerî ya. Çimke welat wijdan o, wijdan kî welat o.

Wijdan, duştê zulm û şerî de qirayîşê zereyê min û to yo. Wijdan ke çin bo, ma çinayî rê benîme?

Alî Beytaş

PARE BIKE
Alî Beytaş
Alî Beytaş serra 1956 de dewa Gimgimî Kûzike de ameyo dinya. Ey 1978 wendegehê maliman qedêna û dima new serrî sey malim Gimgim de xebitîya. Peyê cû Mersîn de 19 serrî gureya û uca xebatê sendikayan ra mektebanê cîya-cîyayan de malimîye kerde. Serra 2006 de teqawut bîyo. Alî Beytaşî kovaranê Vate, Şewçila, Tîroj û rojnameyê NewePelî de nuşt. Aye ra kî teber, yew kitabê xo bi nameyê "Şaîsmaîl" neşr bî.

1 ŞÎROVE

  1. Endi her ke bitaybeti sare Kurdi fam kero ke, inu de vijdan cino. Inude ciwiyayise piya, asitiye, birayen nibeno. Her kes gama xo naera gore bierzo. I vazeneke ma biqedene, zone ma itikate ma, kulture ma. Iye mak hona inura alakutare vazene.

CEWAB BIDE

Please enter your comment!
Please enter your name here