Krîzê fînansî û krîzê asayîşî yê Herêma Federal a Kurdîstanî beşê turîzmî ser o kî tesîr da. Texmîn beno ke emser hîna şenik turîstî yenê Kurdîstanê Başûrî.

Goreyê melumatê serekê Komela Restoran û Hotelanê Kurdîstanî Herş Ahmedî ra sirf Hewlêr de 74 hotel ameyî cadayene. “Sebebo bingeyên cengê duştê ‘Dewleta Îslamî’ (DÎ) yo. Hotelê ke hîna fealîyet de mendî, %50 yê karkeranê xo kar ra eştî. Nîya herême de rêja bêkarîye bena berze.”

Dezgehê Turîzmî yê Kurdîstanî ra Nadir Rostî da zanayene ke semedê krîzê fînansî û asayîşî ra texmîn beno ke emser hîna şenik turîstî do bêrê Kurdîstanê Başûrî.

Herêma Federal a Kurdîstanî de pêro pîya 2.500 hotel û motelî, yew estare ra heta panc estareyî, estê.