Nuştoxê kitabê “Biqehirîyê!” (Indignez-vous!) roja 27.02.2013 de dinyaya xo vurna. Stéphane Hesselî 95 serre de bî.
Serra 2010 de Stéphane Hesselî bi kitabê xo yê “Biqehirîyê!” fenomenêde girs ardîbî meydan. No kitab wextêde kilm de 35 welatan de 4,5 mîlyon reyî ame rotene û seba ê kesanê ke duştê neheqîya globalîzmî der ê, bî yew rayber.
Stéphane Hessel zemanê Cengê Cîhanî yê Dîyinî de zereyê rêxistina rezîztansê Fransa de duştê nazîyan de pêro daybî. Keyeyê Hesselî eslê xo ra yahudî yo, Hessel bi xo 1917 Berlîn de ame dinya. Semedê zulmê nazîyan ra keyeyê Hesselî bar kerd şî Fransa, uca Hessel serra 1937 de bî hemwelatîyê Fransa. 1944 de Stéphane Hessel hetê nazîyan ra yeno pêgirewtene, labelê dima besekeno ke hepisxane ra biramo. Heta merdişê xo Hesselî xo tim seba heqê merdiman feda kerdêne.
Kitabê xo de Hesselî rexneyê kapîtalîzmê fînansî, seypênêbîyayîşo sosyal û muameleyê skandalê komelanê eqalîyetan kerd. Wisarê ereban de fikrê kitabê Hesselî yew faktoro muhîm bî.
