Sindoqa weçînitişî ra kamcîn partîye ke vejîye, CHP û MHP nêvejîyê. Çunke CHP û MHP operasyonê 17. kanûne ra nat bi qilêr û gemarê kaset û masetan vejîyê meydanan û sîyasetê xo qilêr û gemarê kasetanê AKP ser o kerd. Nê qilêr û gemarê dizdan ser de xo gêvzda û vinetî. La kaset û masetan kî ne CHP ne kî MHP ranêxelesnê. Leweyê naye de helbet weçînitoxê AKP kî dizd û lewendanê xo rê wayîr vejîyê.

Her çiqas ke BDP bi Ahmet Turkî kî 11 şaristananê Kurdistan de îdareyê beledîya guret xo dest kî, mi ra gore no reqem goreyê weçînitoxanê kurdan şenik o. Hama goreyê weçînitişê 2009î, rayê BDP bîyê zêde. Qet bêguman partîyanê muxalefetî ra oncîya BDP linge eşte ra xo ver û 11 şaristananê Kurdîstanî de îdareyê beledîya guret xo dest. Leweyê naye de reyna xeylê qezayanê Kurdîstanî de kî îdareyê beledîya guret xo dest. Ma kî nê namzedanê BDP ju bi ju fîraz kenîme û ci rê serkewtene wazenîme.

Nê weçînitişê beledîya de reyna rind ame zanitene ke tayê kurdan reyna rayê xo berdî day bi dişmenê xo yê dizdî. Yanî, day partîya Erdoganî. Ewro eke partîya nê dizdan hona dewe, qeza û şaristananê Kurdîstanî de ke bêhemd rayan cêna, demeke kurdî hona heşarê serê xo nêbîye. Ya hona heşarê serê xo nêbîye, ya kî hona binê tesîrê bawerîye (dîn) der ê. Partîya dizd û zulmkaran ke hona welatê ma de hukm kena, naye ser o kî gere her kes rind bifikirîyo.

Mi ra gore nê weçînitiş de tayê kurdan oncîya bi destanê xo awe onte arêyê AKP. Ewro çerxê arêyê AKP ke cêreno, no semed ra cêreno. Ewro hona mintiqaya Kurdîstanî binê zulm û talanê AKP der a. Gere kurdî verê nê zulm û talanê AKP de bêçare, bêkes û bêomid memanê. Gere kurdî bi xo êndî xo bidê îdare kerdene. Hama qet nêbo qeza û bajaranê Kurdîstanî de gere îdare beledîya bicêrê xo dest. Ewro kurdî ke îdareyê beledîya ke mecêrê xo dest, xizmet û zaf çîyan ra marûm manena.

Herçiqas ke BDP 11 şaristananê Kurdîstanî de îdareyê beledîya guretî kî, hende cayê zê Çewlîg de, cayê zê Xarpêt de, cayê zê Riha de, cayê zê Mûş de, cayê zê Erzingan de hona hukmê AKP û partîyanê bînan ke dewam keno, no kî ayb û şermêde pîl o. Tayê kurdê sunî rayanê xo hona-hona kî danê AKP. Kurdê sunî ke rayanê xo danê AKP, ê ma şarê man o alewî rayanê xo dano kamcîn partîye?

Wa wendoxê hêcayî qusurê mi de nîyamedê! Çunke no persê mi, ê perskerdene nîyo, la ez oncîya kî no pers ser o fikrê xo nusena. Her kes kî rind zano ke dinya aleme kî rind zano ke ronayîşê CHP ra bi nat alewîyan zafîne heyanî nika rayê xo day CHP û bi destê CHP kî her waxt û her dem kî amey kiştene. Hem kî bi zanitene rayanê xo danê bi dişmenê gonîya xo. Ewro ke şarê man o alewî destekê xo CHP ra bionco, CHP dest de ju sifirê gilorî ra dot çîyê nêmaneno. Şare man o alewî hertim leweyê CHP de ca guret, la CHP rojê leweyê şarê man ê alewî de ca nêguret.

Naye ser o kî nê weçînitiş de dêrsimijan dersêda rinde daye bi CHP. Herçiqas ke Dêrsim de weçînitiş werteyê CHP û BDP de vêrd ra kî, hende weçînitoxanê Dêrsimî reyna, yanî reya hîrêyine kî CHP Dêrsim ra kerde teber û îdareyê beledîya da bi namzedê BDP Mehmet Alî Bulî.

Wendoxê hêcayî, persê ke mi bi sernameyê nuşteyê xo pers kerdo: “Sindoqa weçînitişî ra kamcîn partîye vejîye?”, ma bêrîme cewabê nê persî. Seke yeno zanitene, zereyê nê axîşer de reya viren a ke Dêrsim Pulur de ju namzedê TKP (Partîya Komunîst a Tirkîya), Fatîh Mehmet Maçoglu, qezenc keno. Yanî, vatena mi aw a ke sindoqa weçînitişî ra namzedê TKP vejîya, la şikir bi rama Heqî ke CHP û MHP nêvejîyê.

(Resim: ANF)

2 ŞÎROVEYÎ

  1. Birez Gestemerde werteye TKP, CHP û MHP ferq çîno, tena ferqe nauns yakî reng este. Ju asîmîlasyonê suro, ju gewro, ju bi çekano. Pêro vazeneke ziwanê, kulturê, tarixê ma xirabin kere. Pulur de çend tene karker este ke yene uskade propaganda virazene. Endi TKP MKP endi çend tene KP ye Tirkî este, gam u gam welate ma terk kere, xelesiya ra tepîya kirmancî ebe xo qerar dane, bi sîstemê sinen xo îdare kene. Labelê hona waxtê îdeolojîy nîyo, rave xelesîyayis û azadîye tepîya îdeolojîy. Be azadîyê îdeolojî tena asîmîlasyono.

    Dikara Dêrsiminfo û nusnoxî re anca tesekur ken ke dustê na asîmîlasyonê giran de ju moralê girs dane sarê ma.

  2. Birêz Meymanê Usarî,sere de to re zere û can ra sêlamê xoyê germinî ruşnena û vana rind ke to est a. Mordem gere nê mewzuyê TKP sero hîra hîra binusno. Cayê zê Dêrsim Pulur de ju namzedê TKP ke vejîno, naye kî gere şarê Pulurî xo ra pers kero, qey TKP? Mi nusteyê xo de nêvato ke rind ke namzedê TKP qezenc kerdo. Nika seke nameye xo kî sera wo: Partîya Komunîst a Tirkîya wa, yane bi kilm Komunîstê Tirkê. Dêrsim ne welatê komunîstanê tirkan o,ne kî welatê kemalîstanê tirkan o.Dêrsim bajarê de bi nam û şan o. Welatê de bi reng û veng o. Dêrsim bi namê xo, bi tarixê xo, bi kulturê xo, bi kamîya xo welatê de hêca wo. No sebeb ra kî gere dêrsimijî bi xo, xo biderê îdare kerdene,şaro xerîb nê.

Comments are closed.