Serra 2010 de sermayegozarê namdarî George Sorosî daybî zanayene ke zerrn herîneno. O wext ra heta nika fîyatê zerrnî bî diqat. Rojnameyê ekonomî yê Amerîka nika xebere neşr kenê ke Soros no taw zerrnê xo roşeno. Sermayegozarê bînanê namdarî jê (sey) Barry Rosensteîn û Paul Touradjî kî xo zerrn ra oncenê (ancenê) peyser. Para zerrnê Sorosî peynîya 201o de 774 mîlyon Dollarî bîye, na hûmare no taw 6 mîlyon a, yanî Sorosî depoyê xo ra 768 Dollarî zerrn vet.
1968 de Sorosî hevalê xo Jîm Rogersî ra pîya fonê “Quantum”î herînaybî û no fon mabênê 20 serran de erja xo 4 mîlyon Dollarî ra kerda 15 mîlyar Dollarî. Roja 16.09.1992 de kî Sorosî bi spekulasyonê xo duştê Sterlînî de dovîzê Brîtanya ardîbî war, a roje jê (sey) “Çarşema Sîyaye” kota tarîx. Sorosî bawer kerdîbî ke erja Sterlînî o wext zêde bîye, no rî ra gerek rja xo vîndî bikerdêne. Soros rast vejîya, Îngilîstan kî mecbur mend bî ke juyîya (yewîya) pereyî ya Ewropa ra bivejîyo. Sorosî ju (yew) peşewe de 1,4 mîlyar Dollarî qezenc kerdîbî.
Coka barê qisayê Sorosî dinyaya fînansî de giran o. Sorosî ke dovîz, îndeks û erja asinan ser o qisey keno, bala borsakaran anceno (onceno).
George Soros yahudîyê Macarîstanî yo. Çêyê (keyeyê) xo nazîyan ra zaf zulm dî. Serra 1947 de rema ame Londra, Sorosî ua (uza) ekonomî wend. Dima şî New York û heta nika borsa de gureyeno. Sorosî ra gore gerek merdim (mordem) heyat de pasîf memano, vano rîzîkokotiş çîyêde rind o. Sorso 12. tebaxe de bî 81 serrî. Seba ke xo kokim vîneno, Soros wazeno xo karê borsa û fonan ra bianco (bionco) û êndî tena pereyê çêyê (keyeyê) xo îdare bikero. Nê 26 mîlyar Dollarî ra 25 mîlyarî yê Sorosî yê.
