Keyepel Nuştoxî ra Serkewtena Kobanê

Serkewtena Kobanê

500
0

Kobanê se û hîris û çar rojan ra dime bîye azade. Ez kî serkewtena Kobanê bi can û bi royê xo yê Kirmancîye firaz kena û kesanê ke seba serkewtena Kobanê canê xo da, înan kî bi rumet yad kena.

Helbet henî rehet-rehet Kobanê azad nêbîye. Bi xoverdayîş û bi mucadeleyêda hewle bîye azade. No semed ra kî îta ra wa selam bo dayîkanê Kobanê rê, selam bo wa xort û azebanê Kobanê rê, selam bo wa kal û pîranê Kobanê rê, selam bo wa qic û pîlanê Kobanê rê, selam bo hêzanê kurdan rê, selam bo êzîdîyan rê, selam bo armenîyan re, selam bo kirmancan rê, selam bo wa hazar reyî sêlam bo…

Serkewtena Kobanê, serkewtena kurdan pêrune ya. No sebeb ra kî na serkewtena Kobanê gere hetê hêzanê kurdan ra rind bêrone wendene. Rind bêrone wendene ke wa kurdî êndî verba dişmenê xo de pîya doş danê doş û henî hereket kenê. Rojanê tengan de gere hertim leweyê jubînî de bê ke wa dinya kî bizano ke kurdan êndî jubîyena xo peyda kerda.

Bêbextanê ke roj bi rojî vatê “Kobanê gineno war o”, wa nê bêbextî kî naye rind bizanê û na jubîyene ra bitersê ke êndî ê kî gore naye raye bicêrê.

Reyna serkewtena Kobanê de rind ame zanitene ke waxto ke kurdan bi can û bi royê xo verba terorîstan û çeteyan de pîya mucadele kerd, pîştîya xo henî rehet-rehet nêna hard.

Bi rojan û bi aşman bî ke Kobanê binê zulm û zordarîya terorîstan û çeteyanê “Dewleta Îslamî” (DÎ) de bîye. Nê çeteyê û terorîstê DÎ bi xoverdayîş û bi mucadeleyêda hewle Kobanê ra ameyî pak kerdene. Yanî, nê terorîstanê ke waştêne feqir û fuqarî qir kerê û şorêne cenet, la bi hêz û qeweta kurdan nê terorîstî nêke şî cenet, ju bi ju adirê cehenemî de veşayî.

Helbet bi teberkerdene no kar nêxelesîno. Hona seba înşakerdena Kobanê xeylê emeg û ked, xizmet û fedekarîye gere bêrone kerdene ke wa Kobanê zê verî oncîya şên û awan bo. Ewro Kobanê bi hard bîya ju. Kemere kemere ser o nêmenda. Kobanê xan û xirab a. Cîgerê mordemî benê lete-lete. Herçiqas ke Kobanê bîye azade kî, hona miletî ser o tesîrê tank û topan, tesîrê nê cengê gemarinî dewam keno.

Nê kerdenanê terorîstan û çeteyan ra dime kurdî êndî gere doş bido doş û game bi game, roje bi roje verba xoserîya demokratîke bixebetîyo û raye bicêro. Zobîna raxelesîyena kurdan çin a. Destê xo xoserîye ra rameverdo. Raxelesîyena kurdan oncîya kurdan dest der a.  Wext wextê xoserî yo, wext wextê serkewten o.

Wa bicuyo serkewtena Kobanê!

PARE BIKE
Wusênê Gestemerde
Wusênê Gestemerde serra 1971 de dewa Gimgimî Gestemerde de ameyo rîyê dinya. Serra 1990 ra nat Ewropa der o. Endamê Înstîtutê Ziwan û Kulturê Kirmancî (Zaza) ÎKK e.V. Berlînî yo û demê kî karê Komîteya Rayeraberdîşê Înstîtutî de bi hevalanê xo aktîf xebitîya. Serra 2000 ra nat ziwan û kulturê xo ser o xebitîno û bi kirmanckî (zazakî) meqale, hîkaye û şîîran nuseno. 2012 de Gestemerdeyî Xelata Edebîyatî ya Huseyîn Çelebî girewte.

CEWAB BIDE

Please enter your comment!
Please enter your name here