Çend aşman ra tepîya qerarê parlamentoyê Îraqî roja panşeme bellî bî: serekkomaro newe yê Îraqî wezîrê Yewîya Niştimanî ya Kurdîstanî (YNK) Dr. Fuad Masum o.

265 rayan ra bi 211 rayan Dr. Masum ame weçînitene. Nîya Dr. Fuad Masum cayê Celal Talabanî cêno. Talabanî 7. nîsane 2005 de bîbî serekkomarê Îraqî. Goreyê qanûnê bingeyî yê Îraqî wezîfeyê serekkomarî yo ke seba hukmatronayîş yew wezîfedar weçîno. Yew qaydeyo neresmî yê Îraqî vano ke gerek sey serekkomarî yew kurd bêro weçînitene, serekwezîr erebo şîî bo, serekê parlamentoyî kî erebo sunî bo.

Bi nameyê xo yo tam, Dr. Mihemed Fuad Masum Hawramî, serra 1938 Koye, nêzdîyê Silêmanîye de ame dinya. May û pîyê ey Hewraman ra yê û keyeyanê muhîman ê dînî ra yê. Dr. Masum û Celal Talabanî domanênîya xo ra bi nat hevalê yewbînî yê. Badê ke mektebanê dînî de wend, serra 1958 de Dr. Masum unversîteya Al-Azharî yê Misirî de îlahîyat wend û uca kî doktoraya xo kerde. O dem de Dr. Masum endamê Partîya Komunîst a Îraqî bîye. Ancîya, 1964 de bî endamê Partîya Demokrat a Kurdîstanî (PDK). Mabênê 1973 û 1975 de kî Masum Kaîro de temsîlkarê Mele Mustafa Barzanî bî. Serra 1975 de Dr. Masum awankerdoxanê YNK ra yew bî. Seba ke têkilîya Masumî bi PDK rind bîye, aştîya birakujî de rolêde girs kay kerd. Serra 1992 de Dr. Masum sey serekwezîrê verênî yê Herêma Kurdîstanî ame weçînitene. 2004 de Masud bî serekê parlamentoyê Îraqî. Dr. Fuad Masum zewicîyayo û panc kênayê xo estê.

CEWAB BIDE

Keremê xo ra şîroveyê xo binuse
Keremê xo ra nameyê xo binuse