Xortêde dêrsimij bi nameyê Gazî Akbayirî ke barê de waşt ke kilamêde kirmanckî bêro vatene, hetê grûbêda meymanan ra ame kiştene. Raver ra ame kardî kerdene, dima bi heşt qersunan ame kiştene.

Qezaya Îzmîrî Alîaga de xorto dêrsimij Gazî Akbayir ke 25 serrî de bîyo, şî barê ke xo bixecelno. Akbayirî muzîsyenî ra ke zonê (ziwanê) ey ê dayîke kî kirmanckî bî, kilamêda kirmanckî waşte. Wexto ke muzîsyenî dest bi cinitiş û vatişê kilame kerd, grûbê ke bar de bîye, hêrişê Akbayirî kerd. Akbayirî ke va “Mi zonê (ziwanê) xo yê dayîke de kilamê waşte”, tayê kesan kardîyê xo vetî. Akbayir panc (ponc) cayan ra bî dirbetin, ey ke waşt biremo, na fay qersune bî. Akbayirî ke cerebna bireso erebeya xo, canê xo rîyê heşt qersunan ra da.

Meyîtê Akbayirî ame berdene bi morgê Nêweşxaneyê Dewlet ê Alîagayî. Vizêr meyîtê ey hetê çêyê (keyeyê) Akbayirî ra ame wedardene. Hêrişkarî serebûtî ra tepîya bîy vîndî. Ê nika benê saye, hîrê kesî binê nezaretî der ê.

Nîsanê 2009 de kî serebûtêde nîyanên Tirkîya qewimîyaybî. O taw ju (yew) bar de xortêde kurd Emrah Gezerî Anqara de serrgêra bîyayîşê xo pîroz kerdêne û kilamêda kurdkî waşte. Gezer hetê polîs Serkan Akbulutî ra ameybî kiştene. Mehkeme ra gore vatişê kilamêda kurdkî seba Akbulutî tehrîk bî.

CEWAB BIDE

Keremê xo ra şîroveyê xo binuse
Keremê xo ra nameyê xo binuse